„Нашата поддршка за европската интеграција на Западен Балкан е недвосмислена, но не и безусловна“, рече шефицата на бугарската дипломатија Теодора Генчовска и истакна оти впишувањето на Бугарите во Уставот на РСМ, како услов за отпочнување на преговорите на земјата со ЕУ, ќе го повтори и пред еврокомесарот за проширување Оливер Вархеји, кој денеска е во посета на Софија
Бугарското малцинство мора да биде запишано во Уставот на Северна Македонија, а овој услов мора да биде исполнет пред земјата да ги започне преговорите за членство во Европската Унија, рече бугарската министерка за надворешни работи Теодора Генчовска на форумот „ЕУ се среќава со Балканот. Лекцијата од Украина: Европското проширување – заштитата од војна“, на кој учествува и министерот за надворешни работи на земјава, Бујар Османи, пренесе бугарски „Стандард“.
Генчовска појасни оти овој услов за Северна Македонија е втемелен во декларацијата на Националното собрание и во одлуките на Советодавниот совет за национална безбедност при претседателот на државата.
„Не знам какви сигнали даде премиерот, но ова е нашиот став“,
додаде Генчовска.
Таа појасни дека Софија и Скопје се во постојан контакт, водени од желбата да се надминат вештачките поделби наметнати за време на југословенскиот режим. Според неа, градењето лојални односи и наоѓањето заеднички јазик помеѓу двете земји е сложен и долг процес кој зависи од политичката волја, а не од роковите.
„Нашата поддршка за европската интеграција на Западен Балкан е недвосмислена, но не и безусловна“,
истакна Генчовска.
Генчовска најави оти со овој став ќе го запознае и еврокомесарот за проширување Оливер Вархеји на нивната средба. Еврокомесарот Вархеји ќе учествува и на форумот на кој во Софија се собираат многу европски политичари, меѓу кои и министерот за надворешни работи на Северна Македонија, Бујар Османи.
„Ова е уште една средба со еврокомесарот Вархеји. Повторно ќе го запознаеме со ставот на нашата земја, да видиме што можеме да направиме заедно со нашиот колега од Северна Македонија, за да постигнеме напредок. Бугарското мнозинство да влезе во Уставот на Северна Македонија со ЕУ како гарант е услов поставен во декларацијата на Народното собрание и Советодавниот совет за национална безбедност“,
рече Теодора Генчовска.