Откако западните земји воведоа санкции кон Москва по започнувањето на офанзивата против Украина, Русија неколку пати го прекина снабдувањето со гас за Европа, која е силно зависна од неа
Рускиот гигант „Газпром“ најави дека од четврток целосно ќе го прекине снабдувањето со гас за француската групација „Енжи“, бидејќи не платила за вкупното снабдување со овој енергенс од јули.
Француската енергетска компанија претходно објави дека добила известување од рускиот гигант „Газпром“ за дополнителни и итни намалувања на испораките на гас „поради несогласувања меѓу страните за спроведување на договорот“.
„’Газпром Експорт’ го извести ‘Енжи’ за целосно прекинување на испораките на гас од 1 септември 2022 година до добивањето на целата финансиска сума за испораки“,
се наведува во соопштението на руската групација објавено на Телеграм.
Од „Газпром“ велат дека, според указот на рускиот претседател Владимир Путин, потпишан на крајот на март, „забрането е испорака на природен гас на странски купувач доколку тој не ја извршил целата исплата во рамките на условите наведени во договорот“. „Газпром“ додава дека до крајот на денот во вторник не ги добил вкупните суми за испорака на гас во јули.
Француската компанија одби да ја коментира најавата на „Газпром“.
Испораките на руски гас за француската компанија веќе се значително намалени од почетокот на конфликтот во Украина. Групацијата „Енжи“ денеска потсети дека веќе вовела мерки за да може да ги снабдува своите клиенти и во случај „Газпром“ целосно да го прекине снабдувањето.
Откако западните земји воведоа санкции кон Москва по започнувањето на офанзивата против Украина, Русија неколку пати го прекина снабдувањето со гас за Европа, која е силно зависна од неа.
Таков е случајот со Бугарија, Полска, Холандија, Финска, Латвија…