Со седницата ќе претседава пратеничката од редовите на Социјалдемократскиот сојуз (СДСМ), Славјанка Петровска
Претседателот на Собранието, Африм Гаши за утре во 11 часот ја закажа седницата на Комисијата за надзор над работата на Агенцијата за национална безбедност (АНБ) и на Агенцијата за разузнавање (АР) во врска со наводите за незаконско прислушување во периодот од 2019 до 2024 година.
Во известувањето за закажаната седница се вели дека со неа ќе претседава пратеничката од редовите на Социјалдемократскиот сојуз (СДСМ), Славјанка Петровска.
„Ве известувам дека согласно членот 126 од Деловникот на Собранието со третата седница на Комисијата за надзор над работата на АНБ и АР ќе претседава членот на Комисијата, пратеничката Славјанка Петровска“,
се вели во известувањето.
Единствена точка на дневен ред е предог-заклучокот за вршење надзор над работата на АНБ во просториите на Агенцијата.
Ова следува откако пратеникот од редовите на ВМРО-ДПМНЕ, Љупчо Пренџов, вчера побара да биде свикана итна седница на собраниската Комисија за надзор над работата на Агенцијата за национална безбедност (АНБ) и Агенцијата за разузнавање (АР) по наводите за незаконско прислушување во периодот од 2019 до 2024 година.
Како еден од членовите на комисијата го повика претседателот на собраниското тело, Скендер Реџепи, да закаже итна седница за да се утврди точен датум за официјална посета на Агенцијата за национална безбедност, преку која ќе се изврши увид во состојбите и темелно испитување на сите околности поврзани со случајот.
На повикот на пратеникот од ВМРО-ДПМНЕ веднаш одговори претседателот на матичната собраниска комисија Скендер Реџепи, кој е дел од опозициската коалиција „Европски фронт“, предводена од ДУИ.
Реџепи одби да свика седница со образложение дека е дискриминиран и дека не може да присуствува на седницата бидејќи сè уште нема одговор на барањето за безбедносен сертификат, кое го поднел кон крајот на минатата година.
Посочи дека претседателот на Собранието има можност да свика собраниска комисија за надзор над АНБ и АР.
И пратеничката Петровска денеска побара итно свикување на Комисијата за надзор над работата на АНБ.
Од ВМРО-ДПМНЕ вчера побараа да биде свикана итна седница на оваа собраниска Комисија.
Опозицискиот СДСМ во неколку наврати повика да се декласифицираат документите поврзани со наводите за незаконското прислушување во периодот од 2019 до 2024 година. ВМРО-ДПМНЕ, пак, ги обвини опозиционерите дека блефираат со барањето за декласификација сакајќи на тој начин да ги спасат организаторите на случајот.