Според документот од Собранието, Гаши за утре во 10 часот ја свикува четвртата седница на Комисијата за финасисрање и буџет, со единствена точка на дневниот ред – предлог-законот за задолжување на Република Северна Македонија кај Унгарската експорт-импорт банка по скратена постапка
Претходно во денот, Гаши постапи различно во сличен случај со комисијата во која треба да се разгледа законот за бранители
Додека денеска претседателот на Собранието Африм Гаши информираше дека нема да закаже седница на матичното работно тело за да се разгледа законот на бранителите, тој попладнето свика седница на Комисијата за финасирање и буџет, откако тоа во деловничкиот рок не го стори претседателката Сања Лукаревска.
Според документот од Собранието, Гаши за утре во 10 часот ја закажал четвртата седница на Комисијата за финасисрање и буџет, со единствена точка на дневниот ред – предлог-законот за задолжување на Република Северна Македонија кај Унгарската експорт-импорт банка по скратена постапка.
„Ве известувам дека согласно членот 126 став 3 од Деловникот на Собранието на Република Северна Македонија со четвртата седница на Комисијата за финасисрање и буџет ќе претседава членот на комисијата, пратеникот Бојан Стојаноски“,
пишува во документот од Собранието.
Според новиот Деловник за работа на Собранието, доколку Лукаревска, како претседателка, не свика седница на Комисијата, тогаш заседанието го закажува претседателот на Собранието, а со него претседава член на комисијата што тој ќе го определи (до нејзиното завршување).
Но, во случајот со свикувањето на Комисијата за социјална политика, демографија и млади, во која треба да се разгледа предлог-законот за бранители, што одбива да го направи претседателката Илире Даути, од Собранието информираа дека Гаши не може да постапи според Деловникот и да ја закаже седницата на Комисијата затоа што таа веќе била закажана и одржана денеска во 11 часот.
Сепак, ако се погледне распоредот на денешните активности на Собранието на веб-страницата на законодавниот дом, се гледа дека имало седница на Комисијата за социјална политика, демографија и млади, но не со законот за бранители на дневен ред, туку на оној за изменување и дополнување на Законот за пензиско и инвалидско осигурување.
Онаку, лидерот на СДСМ и пратеник, Венко Филипче, денеска ја повика власта да го повлече предлог-закон за задолжување од Унгарија и да го поднесе по редовна постапка. Во спротивно, рече Филипче, Сања Лукаревска, претседателката на Комисијата за финансирање и буџет, нема да го стави овој закон на расправа. Според него, треба да се организира јавна експертска дебата, а законот да ги помине сите филтри, со што би се прецизирал секој аспект на задолжувањето, ќе се расчистат сите дилеми и ќе се гарантира дека граѓаните ќе бидат заштитени.
Пратеникот на ВМРО-ДПМНЕ, Бојан Стојаноски, во врска со најавата на опозицискиот СДСМ, рече дека е лицемерно, од една страна, оваа партија да го блокира законот со кој се обезбедуваат средства за капитални проекти за општините, а од друга страна, општините каде што градоначалникот е од редовите на СДСМ, како Струмица, Делчево, Валандово, Пробиштип, да поднесуваат проекти кои ќе се финансираат со овие средства.
Инаку, во образложението на предлог-законот за задолжување на Република Северна Македонија од 500 милиони евра кај Унгарската експорт-импорт банка, кој се носи по скратена постапка, меѓу другото, се наведува дека Република Северна Македонија ќе ѝ плати провизија за извршени правни услуги на независна фирма избрана од страна на Унгарската експорт-импорт банка, приватно друштво со ограничена одговорност.
Во врска со провизиските трошоци за правни услуги кои земјава треба да ѝ ги плати на фирма по избор на Унгарската банка, Мицкоски влера рече дека ќе бидат во износ од 70 илјади евра. Оваа сума, како што кажа тој, е десетпати помала од она што во минатото како држава сме го плаќале за претходни задолжувања. Од опозицијата, пак, рекоа дека од далеку се гледа дека заемот е коруптивен.