Во обраќањето до јавноста, претседателот на Собранието вели дека општество што тежнее да биде дел од европското семејство мора да се гради врз основа на почит и еднаквост на сите граѓани
Претседателот на Собранието, Африм Гаши, се приклучи на осудите на националистичкото скандирање на дел од публиката во Куманово, за време на кошаркарскиот натпревар меѓу Македонија и Романија. Неговото обраќање го почнува со порака дека треба сите да застанеме и длабоко да размислиме што се случува со нашето општество, ако спортот, кој треба да е мост за обединување, се претвора во сцена на омраза и поделби.
„Свесен за чувствителноста на моментот и за важноста секој збор да биде внимателен и обединувачки, денес сакам да им се обратам на сите граѓани на Република Северна Македонија, без разлика на етничка, јазична или политичка припадност: Навредливите извици и говорот на омраза што се слушнаа таа вечер не го претставуваат духот на спортот, ниту духот на нашите граѓани, а пред сè не ги претставуваат вредностите врз кои е изграденa нашата држава“,
се вели во обраќањето на Африм Гаши.
Општество што тежнее да биде дел од европското семејство, продолжува Гаши во своето обраќање, мора да се гради врз основа на почит, достоинство и еднаквост за сите граѓани.
„Остро ја осудувам секоја форма на говор на омраза, особено онаа што има цел да раздели луѓе поради нивната етничка или национална припадност. Република Северна Македонија е мултиетничко општество и Албанците се државотворен народ.
Ги повикувам сите институции, сите политички партии, сите граѓани, да застанеме заедно против омразата.
Да се издигнеме заедно за поправедна, почесна и пообединета иднина. Тоа треба да биде нашиот пат. Тоа е наша должност“,
вели во своето обраќање Африм Гаши.
Натпреварот меѓу Македонија и Романија се одигра завчера. Во дел од играта можеа да се слушнат антиалбански скандирања. На натпреварот присуствуваше и премиерот Христијан Мицкоски. Тој денеска го осуди скандирањето, но додаде дека за време на натпреварот не ги слушнал паролите бидејќи станувало збор за мала група луѓе.
Јавното обвинителство уште вчера објави дека отворило предмет за случајот, а денеска биле повикани неколку лица по извршеното препознавање од снимките на настанот.
Настанот беше повод за преписка и меѓу партиите од албанскиот блок. Опозоциската ДУИ ја прозва владејачката ВЛЕН за инертност и повика дел од нивните функционери да си поднесат оставки. ВЛЕН возврати дека ниту еден функционер на ДУИ не си поднел оставка кога имало слични настани и дека овојпат, за разлика од минатото, случајот ќе има своја правна разрешница.