На вечерата, чиј домаќин беше шефот на дипломатијата на Северна Македонија и претседавач со ОБСЕ, Бујар Османи, присуствуваа министри за надворешни работи на САД, на ЕУ, на земјите членки на ЕУ, Велика Британија, на земјите партнери од Медитеранот, Блискиот Исток и од Азија
Во хотелот „Александар палас“ во Скопје вечерва се одржа неформалната вечера на министрите за надворешни работи кои учествуваат на 30. Министерски совет на Организацијата за безбедност и соработка во Европа – ОБСЕ, чиј домаќин беше шефот на дипломатијата на Северна Македонија и претседавач со ОБСЕ, Бујар Османи.
Како што беше најавено, шефовите на делегациите од земјите членки на ОБСЕ и држави партнери разговараа на тема воената агресија врз Украина и потребата од функционална Организација во време на конфликти и зголемени тензии.
На вечерата присуствуваа министри за надворешни работи на САД, на ЕУ, на земјите членки на ЕУ, Велика Британија, на земјите партнери од Медитеранот, Блискиот Исток и од Азија.
По вечерата е предвидена и културна програма за високите гости со настап на Влатко Стефановски, Теодосиј Спасов и Дамир Имери.
На најголемиот политичко-дипломатски настан што се случил во државава од осамостојувањето, ќе учествуваат 76 делегации од 57 земји членки и држави партнери на Организацијата.
На Министерскиот состанок се очекуваат одлуки за изборот на претседавач за 2024 година, за што на подготвителниот состанок на амбасадори на 57-те земји членки неделава во Виена е постигнат консензус тоа да биде Малта, а треба да се одлучува и за буџетот, како и за именувања за клучните позиции во институциите на ОБСЕ.
Американскиот државен секретар Ентони Блинкен, кој доцна попладнево пристигна во Скопје, по што оствари средби со премиерот Димитар Ковачевски и со министерот за надворешни работи Бујар Османи, се очекува уште вечерва, неколку часа по доаѓањето, да ја напушти земјава.
Блинкен, кој учествуваше на неформалната вечера, која му претходеше на официјалниот старт на Министерскиот совет на ОБСЕ, според најавите, беше најавено веднаш по нејзиното завршување, околу 21 часот, да се упати кон Меѓународниот аеродром „Скопје“ и да замине од земјава.
Шефот на руската дипломатија, Сергеј Лавров, пак, според најавите, нема да слета во Скопје пред 22:30 часот, што е по времето во кое се очекува од земјава да замине американскиот државен секретар.
Тоа значи дека и покрај најавата за присуство и на американскиот и на рускиот дипломат на Министерскиот совет на ОБСЕ, тие воопшто нема да бидат во Скопје во исто време.
Екипата на „360 степени“ вечерва, еден час пред почетокот на неформалната вечера која се одржа во хотелот „Александар палас“, направи обиколка по „Илинденска“ со цел да видиме до каде можеме да се движиме.