Скопјани не останаа имуни на убавото време денеска, па дел од нив времето за слободно движење до 14 часот го искористија за прошетки и рекреација во Градскиот парк.
По фотографиите што „360 степени“ ги направи, се забележува дека голем дел од граѓаните, сепак, не носат заштитни маски или марама, шал со што ќе ги покријат устата и носот. При прошетки не го држат ниту препорачаното растојание од два метри.
Од 1 мај се казнува неносењето заштитна опрема (маска, марама или шал) на устата и носот. Казните кои се предвидени со уредба со законска сила изнесуваат 20 евра за граѓаните.
Опремата не е задолжителна, пак, кога граѓаните се во сопствениот двор, возат велосипед или спортуваат на отворено само ако имаат дистанца од два метри, ако патуваат во моторно возило со лица кои заедно живеат, како и ако се наоѓаат на отворено каде може да одржуваат потребно растојание.
И денеска како и претходните два дена, полицискиот започнува во 14 часот, а од утре (понеделник) ќе започнува од 19 часот.
За лицата над 67-годишна возраст, пак, овие три дена беше дозволено движење од 05 до 11 часот, додека децата и младите до 18 години дозволено движење беше од 12 до 14 часот.
На сила е и забраната за групирање на повеќе од две лица на јавни површини, при што во група од двајца не се вбројуваат децата под 14 години на тие лица, но овој исклучок важи само за термините кога е дозволено движење на млади лица, надвор од полицискиот час.