ДУИ никогаш не понеле одговорност, велат од коалицијата ВЛЕН, по критиките за вчерашните антиалбански скандирања на кошаркарски натпревар во Куманово, пред владина делегација
Функционери на ДУИ никогаш не дале оставка, се брани владиниот партнер ВЛЕН, откако Демократската унија за интеграција побара одговорност и оставки по вчерашниот скандал во Куманово.
За потсетување, вчера, навивачи скандирале антиалбански пораки на кошаркарскиот натпревар меѓу Македонија и Романија што се одигра во спортската сала во Куманово. На натпреварот имало и владина делегација.
Во реакцијата, ВЛЕН наведоа повеќе случаи, меѓу кои: „Монструм“, „Диво Насеље“, случајот со смртта на малиот Алмир, подигнувањето споменик на Цар Душан, „Дурмо Турс“, „Беса Транс“, случајот со модуларната болница итн., за кои велат дека ДУИ молчеле кога на Албанците им се случувале најголемите трагедии.
„Партија што никогаш не почувствувала срам, што никогаш не побарала прошка и што никогаш не презела одговорност за ниту една од овие трагедии – нема ни морал, ни право да зборува за иднината на Албанците. ДУИ не е повеќе глас на Албанците – таа е товар на нивните плеќи. Доаѓа времето на одговорност“,
велат од ВЛЕН.
Претходно до ДУИ побараа сите албански претставници во Владата кои извршуваат клучни извршни функции, јавно да се дистанцираат од овој акт и да ја отворат темата на следната владина седница, со предлог за строги санкции кон одговорните.
„Бараме непосредна оставка од Астрит Исени, заменик-министер за внатрешни работи и оставка од Сафие Садики Шаини, заменик-министерка за спорт, поради нивниот неуспех да реагираат, да го заштитат јавниот интерес и да адресираат еден тежок инцидент што директно го загрозува меѓуетничкиот соживот и достоинството на албанските граѓани“,
бараа ДУИ.
Тие побараа и ВЛЕН да се повлечат од оваа Влада која, како што велат, поттикнува поделби и омраза.
Реагираше и СДСМ. Тие посочија дека говорот на омраза и навредите кон која било етничка заедница е обид да се создаваат поделби меѓу граѓаните, а најчесто тоа се случува пред избори.
„СДСМ апелира до сите граѓани да останат разумни и да не подлегнуваат на провокации и на насилен национализам кој намерно се активира секогаш кога се приближуваат избори. Не е првпат да гледаме како одредени стрктури ја разгоруваат омразата со една цел, да ги поделат граѓаните и да ја пренасочат дебатата од реалните проблеми“,
се вели во реакцијата од СДСМ.
На фејбук профилот на премиерот Христијан Мицкоски се објавени и фотографии од вчерашниот натпревар, на кој присуствувал и тој. Натпреварот го следеле и градоначалникот на Куманово и лидер на ЗНАМ, Максим Димитриевски, министерот за внатрешни работи Панче Тошковски, вицепремиерот Иван Стоиљковиќ и други високи државни претставници.
Натпреварот Македонија – Романија заврши со победа на гостите од 80:72.