Фудбалската и Кошаркарската федерација донесоа одлука за прекин на сите натпреварувања во домашното првенство поради состојбата со коронавирусот и мерки за спречување на неговото ширење.
ФФМ одлучи за прекин на неодредено време на националниот шампионат од Прва и Втора македонска фудбалска лига, потоа третите лиги од МФЛ, како и натпреварите од женскиот шампионат и првенството во футсал.
Претходно, согласно препораките и забраните од Владата на Македонија за превенција од коронавирусот, Комисијата за младински фудбал донесе одлука сите натпревари од младите категории и натпреварите од детските лиги на ФФМ да се суспендираат во наредните две седмици.
Во текот на денот и Кошаркарската федерација донесе одлука за прекин на сите натпреварувања што се под нејзини ингеренции.
„Земајќи ја предвид моменталната состојба со појавата и ширењето на коронавирусот како и препораките на Владата на РСМ и Светската Здравствена Организација, со цел да се заштити здравјето и безбедноста на играчите, тренерите, службените лица и навивачите, раководството на Кошаркарската федерација на Северна Македонија објавува дека сите натпревари во организација на Федерацијата од денеска, четврток, 12 март 2020 година, со одложуваат на неодреден временски период“, соопшти Федерацијата на официјалната веб-страница.