Се чини дека повеќедецениската потрага по озлогласениот француски сериски убиец заврши откако поранешниот жандарм, кој подоцна станал полицаец, во прошталната порака призна дека е озлогласениот сериски убиец Ле Греле.
Маж, идентификуван од француските медиуми како Фрасоа Веров, во средата бил пронајден мртов во изнајмен стан во јужниот град Ле Грау-ду-Роа, на францускиот медитерански брег, пренесува „Ал Џезира“.
Пораката пронајдена до телото пензионираниот полицаец го идентификува како серискиот убиец познат по прекарот Ле Греле, што во превод значи човек со лузни, пренесуваат француските медиуми.
Педесет и деветгодишникот бил жандарм (воен полицаец) пред да стане полицаец, а подоцна се пензионирал. Полицијата го повикала на 24 септември да даде примерок од ДНК, а неговата сопруга го пријавила за исчезнат на 27 септември.
Овој случај е конечно решен кога истражен судија неодамна одлучи да испрати писма до 750 жандарми стационирани во регионот на Париз во тоа време.
Веров е поврзан со четири убиства и шест силувања, но Дидие Сабан, адвокатот кој ги застапува семејствата, вели дека несомнено имало повеќе, а неговата смрт оставила многу семејства без одговори.
„Никогаш нема да ги знаеме сите злосторства што ги изврши Ле Греле“,
рече Сабан, пренесува Би-би-си.
Неговите убиства и силувања го шокираа Париз помеѓу 1986 и 1994 година, но досега никогаш не беа решени.
Меѓу шокантните злосторства што му се припишуваат е убиството на 11-годишната Сесил Блох. Таа беше пријавена за исчезната откако не се појави на училиште во Париз во 1986 година. Телото на Блох подоцна беше пронајдено под стар тепих во подрум на зграда, а официјални лица тогаш изјавија дека била силувана, задавена и прободена, а случајот предизвика шок во Франција.
Меѓу другите жртви на Ле Греле се 38-годишниот Жил Полити, 20-годишниот Германец Ирмгард Милер и 19-годишната Карин Лерој.
Содржината на писмото не е потврдена, но француските медиуми тврдат дека тој признал дека порано имал „импулси што не можел да ги контролира“, но оттогаш „се средил“. Медиумите тврдат дека очигледно ги признал убиствата, без да даде детали за жртвите и околностите.
ДНК на Веров се совпаѓа со доказите пронајдени на местото на злосторствата, рекоа обвинителите, а во тек се и дополнителни анализи.