„Исламска држава“ во провинцијата Хорасан ја презеде одговорноста за нападот преку соопштение објавено вчера на веб-страницата „Амак“. Се вели дека напаѓачот активирал елек со експлозив. Според официјални претставници, во бомбашкиот напад во неделата загинаа 54 лица, меѓу кои најмалку пет деца, а беа ранети речиси 200
Авганистански огранок на „Исламска држава“ ја презеде одговорноста за самоубиствениот бомбашки напад во Пакистан во кој на изборен митинг загинаа најмалку 54 лица, јавуваат светските агенции. Нападот, кој се случи во неделата, е еден од најсмртоносните во регионот во последните неколку години.
„Исламска држава“ во провинцијата Хорасан ја презеде одговорноста за нападот преку соопштение објавено вчера на веб-страницата „Амак“. Се вели дека напаѓачот активирал елек со експлозив.
Според официјални претставници, во бомбашкиот напад во неделата загинаа 54 лица, меѓу кои најмалку пет деца, а беа ранети речиси 200.
Нападот, според агенциите, ги одразува поделбите меѓу исламистичките групи, кои имаат силно упориште во областа во провинцијата Хајбер Пахтунхва која граничи со Авганистан, пренесува регионалниот сервис на Радио Слободна Европа (РСЕ). Исламската партија Џамијат Улема има врски со авганистанските и пакистанските талибанци.
Инаку, пакистанската полиција веќе сугерираше дека зад нападот стојат припадници на „Исламска држава“ во провинцијата Хорасан. Групата е со седиште во соседната авганистанска провинција Нангархар и е ривал на авганистанските талибанци и Ал Каеда.
Пакистанската војска со години се бори против пакистанските талибанци, познати и како Техрик-е-Талибан Пакистан или ТТП, во Баџур пред да го прогласи округот чист од милитанти во 2016 година. Сепак, исламската партија Џамијат Улема, предводена од тврдокорниот свештеник и политичар Фазлур Реман, остана моќна политичка сила.
Десетици лица кои биле полесни повреди во нападот се отпуштени од болница, додека тешко повредените со воени хеликоптери се пренесени во главниот град на провинцијата Пешевар. Бројот на жртвите во меѓувреме се зголеми бидејќи некои од тешко ранетите починаа во болница, изјави лекарот Ѓул Насиб.
Инаку, партијата на Реман се подготвува за избори, кои се очекуваат во октомври или ноември. Абдул Рашид, еден од лидерите на партијата, рече дека нападот имал за цел да ја ослабне партијата, но дека „тие не можат да ја намалат нашата одлучност“.
Партијата на Реман е дел од коалициската влада на премиерот Шехбаз Шариф, која дојде на власт во април 2022 година откако го собори поранешниот премиер Имран Кан со гласање недоверба во парламентот.
Шариф, како што пренесуваат агенции, му се јавил на Реман да му изрази сочувство и го уверил свештеникот дека оние што го организирале нападот ќе бидат казнети. Кан го осуди бомбашкиот напад во неделата. Осуда стигна и од амбасадите на Соединетите Американски Држави и Русија во Исламабад.
Пакистанските талибанци, исто така, се оградија од нападот, велејќи дека тој има за цел да ги сврти исламистите еден против друг.
Инаку, нападот се случи неколку часа пред кинескиот вицепремиер Хе Лифенг да пристигне во Исламабад, каде што потпиша нови договори за зајакнување на трговските и економските врски по повод деценијата на кинеско-пакистанскиот економски коридор, во рамките на кој Кина инвестираше 10 милијарди долари во Пакистан во изминатите десет години.
„Нема да толерираме никакви пречки на патот на пријателството со Кина“,
рече Шариф.
Некои кинески државјани, исто така, беа цел на милитантите во северозападен Пакистан и на други места.
Реман, долгогодишен поддржувач на авганистанската талибанска влада, преживеа најмалку два бомбашки напади од висок профил во 2011 и 2014 година, кога во експлозии беше оштетен неговиот автомобил на митинзи.
Нападот во неделата беше еден од најтешките во северозападен Пакистан во последната деценија. Во 2014 година, 147 луѓе, главно ученици, беа убиени во напад на талибанците врз армиско училиште во Пешевар.
Во јануари 74 лица загинаа во бомбашки напад врз џамија во Пешевар. И во февруари, повеќе од 100 луѓе, главно полицајци, беа убиени во бомбашки напад на џамија во силно обезбедуваната зграда во која се наоѓа полицискиот штаб во Пешевар.