fbpx
Свет

(ФОТО+ВИДЕО) Русија постави системи за воздушна одбрана на згради во Москва?

360степени | 20 јануари, 2023 17:42

Вестите за воздушната одбрана на врвот на зградите во Москва почнаа да се шират истиот ден кога портпаролот на Кремљ, Дмитриј Песков, предупреди на можна ескалација на војната од страна на Украина

Системи за воздушна одбрана, наводно, се инсталирани на врвовите на неколку згради во руската престолнина Москва, бидејќи Кремљ предупредува дека Украина би можела да користи оружје со долг дострел за ескалација на војната, пишува Њузвик.

Во четвртокот на Твитер кружеа слики и видеа за кои корисниците велат дека ги прикажуваат системите за воздушна одбрана Панцир – С1 на покривите на неколку згради во Москва.

Роб Ли, аналитичар во Институтот за надворешна политика за истражување (FPRI) и докторанд на Катедрата за воени студии на Кралскиот колеџ во Лондон, објави на Твитер дека системите се инсталирани во административна зграда во Москва и во зграда управувана од Министерството за одбрана.

Вестите за воздушната одбрана на врвот на зградите во Москва почнаа да се шират истиот ден кога портпаролот на Кремљ, Дмитриј Песков, предупреди на можна ескалација на војната од страна на Украина. Песков првенствено мислеше на ракетите со долг дострел што Украинците ги добиваат од Запад.

„Потенцијално, тоа е крајно опасно, ќе значи доведување на конфликтот на сосема ново ниво, што, се разбира, нема да биде добро од гледна точка на глобалната и паневропската безбедност“,

изјави Песков за новинарите.

Западот е поделен околу испраќањето оружје со долг дострел. Имено, Русија во неколку наврати го предупреди Западот да не ѝ дава оружје на Украина што може да ги загрози целите длабоко во Русија, бидејќи тоа може да доведе до ескалација. Бајден уште во мај минатата година рече дека САД нема да ѝ дадат на Украина оружје со долг дострел со кое би можеле да гаѓаат цели длабоко во Русија.

Но, тоа на Украина можеби нема ни да и треба. „Киев индипендент“ минатиот петок објави дека украинската одбранбена компанија „Укроборопром“ објавила дека завршила со тестирање на беспилотно летало со долг дострел. Дронот има домет поголем од илјада километри, што би му овозможило без проблем да погоди цели длабоко во внатрешноста на Русија.

©2025 360 степени, Сите права се задржани