Оваа досега најголема количина на уништена дрога
Во „Макстил“ денеска беа уништени околу десет тони различни видови на наркотични дроги одземени до август 2022 година по основ на правосилни судски одлуки донесени по завршени кривични постапки, како и врз основа на судски решенија за нивно ништење, изјави министерот за внатрешни работи, Оливер Спасовски.
„Станува збор за уништени повеќе од 8,2 тона марихуана, потоа, околу 100 килограми хероин, хашиш и кокаин, над илјада растенија, семки од канабис, како и 1,2 милиони парчиња психотропни супстанции што претставува најголемо уништено количество запленета дрога досега која на црниот пазар би достигнала според проценките некаде вкупна вредност од 26 милиони евра“,
рече тој.
Уништувањето на дрогата, како што кажа, е реализирано во соработка со МВР, Државната комисија за уништување на наркотични дроги, психотропни супстанции и прекурсори, Агенцијата за управување со одземен имот, јавното обвинителство и судството.
„Оваа досега најголема количина на уништена дрога е резултат на бројните оперативни акции и континуирани активности коишто како МВР ги спроведуваме во изминатите неколку години со цел спречување на нелегалната трговија со дрога и прекурсори, а во насока на ова говори и фактот што само во периодот јануари – јули 2022 година, како резултат на овие активности беше запленета дрога во вредност од 205,5 милиони евра која ќе биде следна за уништување по завршување на законските постапки при што се сузбиени девет организирани криминални групи и спречени седум меѓународни транспорти на дрога“,
кажа Спасовски.
Тој додаде дека МВР, односно сите организациони единици надлежни за сузбивање на недозволената трговија со дрога, продолжуваат со, како што рече реализација на овој врвен приоритет за брз, координиран и ефикасен начин за сузбивање оваа опасна девијантна појава.