„Разбираме дека ниту Ковачевски ниту некој од СДС ќе се осудат да го искритикуваат Талат Џафери, затоа што сега молат за заеднички листи, ама сепак во име на интересите на граѓаните нека го посоветуваат да се приземји и да си го одработи достоинствено мандатот до изборите“, велат од опозициската партија
Прв работен ден на Талат Џафери како технички премиер и веднаш го реализира својот прв проект, паркирање на службениот „мерцедес“ на плоштадот за да пие кафе во ресторан. Среќа не е искомплексиран Џафери до толку, инаку со владиниот авион ќе одеше на работа, пишува во денешното соопштение испратено до медиумите од опозициската ВМРО-ДПМНЕ.
„Автократот од Форино треба да знае дека функцијата која ја врши е одговорна и бара сериозност, а не чаламење и инфантилно однесување. Илјадници граѓани секој ден зависат од политиките на владата, од мерките и проектите. Разбираме дека ниту Ковачевски, ниту некој од СДС ќе се осуди да го искритикува Талат Џафери, затоа што сега молат за заеднички листи, ама сепак во име на интересите на граѓаните нека го посоветуваат да се приземји и да си го одработи достоинствено мандатот до изборите. Филмот со пури, пијалаци, службени автомобили, обезбедување, затворање на пешачки зони и слично, говори за карактерот на Џафери, кој можеби го попримил од ликовите од подземјето со кои се дружел“,
велат од опозициската партија.
Ако по утрото денот се познава, како што велат од ВМРО-ДПМНЕ, Талат планира мандатот да го турка во мафијашки стил.
„Тоа е уште еден доказ дека никогаш не било полошо во Македонија отколку сега со СДС и ДУИ. Затоа важно е да ги поразиме!“,
се вели во соопштението на опозициската ВМРО-ДПМНЕ.
Премиерот на преодната влада Талат Џафери вчера на прес-конференција по примопредавање на функцијата од досегашниот претседател на Владата Димитар Ковачевски, на новинарско прашање дали ќе доаѓа со „мерцедес“ на работа, рече дека нема комплекс со што ќе доаѓа на работата, дали со „мерцедес“ или со приватно возило ќе си оди дома.
„Иронијата на ’мерцедесот’ не му служи никому. Владата има компетенции и одговорности со Устав и со закон, ако одите по уредбата за обврската за создавање на безбедносни услови за вршителите на трите највисоки функции во државата, има посебни одредби. Но, се знае дека во државата во моментот целосно не можат да се обезбедат тие предуслови. Седум години сум бил претседател на Собранието, па не сум прашал со што ќе се возам. Тоа е обврска на институцијата која треба да обезбеди соодветни предуслови за извршување на функцијата“,
изјави Џафери.
За потсетување, со црвени вратоврски на кои пишува „Премиер Албанец – 28.01.2024“, Али Ахмети со сопартијците завчера го славеше изборот на Талат Џафери за премиер на преодната влада.
Видеа од славјето на Тик-ток објави Бленди Февзиу – водител на популарното ТВ-шоу „Мислење“ (Опиниони) на ТВ Клан Албанија, кој е еден од четворицата ВИП гости на ДУИ за кои порталот „Икс“ објави дека цел ден се превезуваат со службено возило од Министерството за политички систем со кое раководи Артан Груби.