fbpx
Свет

(ФОТО+ВИДЕО) Земјотрес со јачина од 7,7 степени во Мјанмар, паника во Бангкок – се шират снимки од срушени згради и мостови

360степени | 28 март, 2025 08:45

Во соседен Тајланд, во главниот град Бангкок, вознемирените жители панично излегуваа од високите згради. Очевидци изјавија дека земјотресот бил доволно силен за да предизвика излевање на вода од базенот

Земјотрес со јачина од 7,7 степени според Рихтеровата скала го погоди Мјанмар, соопшти Американскиот геолошки институт (УСГС). Стотици луѓе во тајландската престолнина Бангкок во паника излегоа од зградите откако почувствуваа дека земјата се тресе, јавува Ројтерс.

Фото: Дизастерс дејли/Икс

Од Мјанмар засега нема информации за евентуална штета. Според Геолошкиот институт на Соединетите Американски Држави (УСГС), епицентарот бил на околу 17,2 километри од градот Мандалеј, кој има околу 1,2 милион жители. Околу 12 минути по првиот земјотрес, втор силен последователен потрес со јачина од 6,4 ја погоди областа.

Потресите биле почувствувани дури и во Бангкок и Чианг Маи, Тајланд

Тресењето на земјата предизвикано од земјотресот со јачина од 7,7 степени според Рихтеровата скала што го погоди Мјанмар се почувствувал дури и во главниот град на Тајланд, Бангкок. Жител на тајландскиот град Чианг Маи, кој сакаше да остане анонимен, за АФП изјавил:

„Ги почувствував потресите околу десет секунди во мојата соба, а потоа сфатив дека не можам да останам внатре. Истрчав на улица“.

„Слушнав бучава додека спиев дома, па истрчав од зградата најбрзо што можев во пижами“,

вели за АФП Дуанџаи, жител на Чианг Маи, популарна туристичка дестинација позната по своите храмови.

Земјотресот бил почувствуван и во Кина

Кинескиот сеизмолошки истражувачки центар (ЦЕНЦ) извести дека земјотресот бил со јачина од 7,9 степени, според новинската агенција Синхуа, додека во објавата на ЦЕНЦ на социјалните мрежи се наведува дека потреси биле почувствувани и во провинцијата Јунан.

Засега нема информации за последиците од земјотресот во самиот Мјанмар, земја во ек на граѓанска војна.

Во соседен Тајланд, во главниот град Бангкок, вознемирените жители панично излегуваа од високите згради. Очевидци изјавија дека земјотресот бил доволно силен за да предизвика излевање на вода од базен.

Се шират снимки од срушени згради и мостови

На социјалните мрежи се споделуваат снимки и фотографии од последиците од силниот земјотрес.

Се чини дека во Бангкок е урнат облакодер што е во изградба.

©2025 360 степени, Сите права се задржани