Специјално направениот бункер бил откриен кога во петокот автобусот се пријавил за излез од земјава на преминот „Табановце“, но царинските инспектори од одделението за оперативни работи при Секторот за контрола и истраги го селектирале за детална контрола
Царинските инспектори пред два дена на граничниот премин „Табановце“, на македонско-српската граница, заплениле автобус со специјално конструиран, адаптиран и изменет простор за криење стока, соопшти денеска Царинската управа.
Како што информираат оттаму, станува збор за автобус на српска фирма превозник, која врши редовен превоз на патници на релација Скопје – Белград.
Специјално направениот бункер за шверц на стока бил откриен кога во петокот автобусот се пријавил за излез од земјава на преминот „Табановце“, но царинските инспектори од одделението за оперативни работи при Секторот за контрола и истраги го селектирале за детална контрола.
„Увидени се прегради во делот на креветот за возачите каде бил направен отвор од каде може да се пристапи до тешко пристапни делови кај задниот дел од автобусот. Отворот бил затворен со метална преграда, а врз тоа била ставена дрвена плоча со тапацир, што претставува специјално адаптиран простор – бункер, со цел криумчарење на стока“,
се наведува во соопштението на Царинската управа.
Оттаму додаваат дека согласно Царинскиот закон, автобусот е привремено одземен, а против возачот е поднесена соодветна пријава до надлежниот Основен суд.
