fbpx
Свет

(ФОТО+ВИДЕО) Торнада пустошат низ САД, повеќе од 20 загинати, стотици згради уништени

360степени | 27 мај, 2024 22:40

Гувернерот на Кентаки, Енди Бешеар, рано утринава прогласи вонредна состојба, додека Националната метеоролошка служба соопшти дека предупредувањето за силно невреме со грмотевици е во сила за делови од Џорџија и Јужна Каролина барем до понеделник попладне

Невремето со грмотевици што ги зафати јужните американски низини и планините Озарк, уби најмалку 21 лице во четири држави и уништи стотици згради, а синоптичарите предупредуваат на влошување на времето. Бројот на загинати за време на викендот вклучува најмалку осум смртни случаи во Арканзас, седум во Тексас, четири во Кентаки и два во Оклахома, според официјални претставници на државната итна помош.

Сопственик на дом седи на подот откако неговата куќа била погодена од торнадо во Темпл, Тексас / Фото: EPA-EFE/Adam Davis

Гувернерот на Кентаки, Енди Бешеар, рано утринава прогласи вонредна состојба, додека Националната метеоролошка служба соопшти дека предупредувањето за силно невреме со грмотевици е во сила за делови од Џорџија и Јужна Каролина барем до понеделник попладне.

„Тоа беше тешка ноќ за нашиот народ“,

напиша гувернерот на Кентаки на социјалната мрежа Икс.

Тој подоцна на брифинг со новинарите изјавил дека разорните бури ја погодиле речиси целата држава.

Официјални лица соопштија дека 100 државни автопатишта и патишта биле оштетени во невремето.

Вонредна сезона на урагани

Најмалку седум лица, меѓу кои две деца, загинаа, а речиси 100 се повредени во саботата вечерта кога силно торнадо го зафати северен Тексас во близина на границата со Оклахома, изјави во неделата гувернерот на Тексас, Грег Абот. Стотици илјади Американци се соочија со прекин на електричната енергија поради временските услови, според веб-страницата за следење PowerOutage.

„Во некои области може да потрае неколку дена да се врати струјата“,

рече гувернерот на Кентаки, држава во која повеќе од 180 000 домови се без струја.

Националната метеоролошка служба предупреди на дополнителни бури во долините на Охајо и Тенеси, кои ќе донесат силни ветрови, град, торнада и обилни дождови кои би можеле да предизвикаат поројни поплави. Последното екстремно време доаѓа само неколку дена откако силно торнадо зафати град во Ајова, убивајќи четири лица, а повеќе торнада го погодија Тексас минатата недела.

Семејство ја разгледува штетата откако нивната куќа била погодена од торнадо во Темпл, Тексас / Фото: EPA-EFE/Adam Davis

Во меѓувреме, САД се подготвуваат за она што владините прогнозери го нарекоа потенцијално „вонредна“ сезона на урагани во Атлантикот, што започнува на 1 јуни.

©2026 360 степени, Сите права се задржани