Безбедносните сили се распоредени низ целата земја за брзо отстранување на сите блокади, соопштија официјални лица, што значи дека Франција сè уште не е во целост блокирана. Речиси 200 демонстранти се уапсени низ целата земја, а имало и помали судири
Демонстрантите во Франција денеска демонстрираат низ целата земја, блокирајќи го сообраќајот, палејќи канти за ѓубре и повремено судирајќи се со полицијата во протестот „Блокирај сè“, лути на политичарите и планираните намалувања на буџетот.
Безбедносните сили се распоредени низ целата земја за брзо отстранување на сите блокади, соопштија официјални лица, што значи дека Франција сè уште не е во целост блокирана. Речиси 200 демонстранти се уапсени низ целата земја, а имало и помали судири. Многу од демонстрантите го искажаа својот гнев кон претседателот Емануел Макрон, кој веќе се соочи со политички превирања откако парламентарната опозиција во понеделникот се обедини за да ја порази неговата влада.
„Тоа е исто с**ње, исто е, Макрон е проблемот, а не министрите. Министрите, тие се проблемот, но поголем проблем е Макрон и неговиот начин на работа, што значи дека мора да си оди“,
рече Фред, претставник на огранокот за јавен превоз РАТП на синдикатот ЦГТ, еден од учесниците во протестот во Париз.
Полицијата во Париз испали солзавец кон младите демонстранти кои го блокираа влезот во средно училиште, а пожарникарите отстранија изгорени предмети од барикадите. Според полицискиот извештај, голема група од околу 1 000 демонстранти била спречена да влезе во железничката станица „Гар ди Нор“ во Париз.
Министерот за внатрешни работи Бруно Рејто им изјави на новинарите дека демонстрантите запалиле автобус во западниот град Рен, додавајќи дека некои демонстранти ја нападнале полицијата со големи камења, но не прецизира каде.
Движењето организирано под името „Блокирај сè“ е масовно изразување на незадоволство кај француското население. Организирано без централизирано водство и ад хок преку социјалните медиуми, се појави онлајн во мај меѓу десничарските групи, соопштија официјални лица, но оттогаш е преземено од левицата и крајната левица.
Народот е незадоволен
По гласањето за недоверба, францускиот парламент го разреши премиерот во заминување Франсоа Бајру поради неговите планови за справување со растечкиот долг на земјата. Макрон вчера назначи нов премиер, негов петти за помалку од две години, избирајќи го својот близок сојузник Себастијан Лекорну, разбеснувајќи ги левичарските политичари.
Во Нант, на западот од земјата, демонстрантите блокираа автопат со палење гуми и канти за ѓубре. Полицијата употреби солзавец за да ги растера. Во југозападниот град Монпелје полицијата се судри со демонстрантите кои поставија барикади за да го блокираат сообраќајот на кружен тек. Тука, солзавец беше употребен и за растерување на демонстрантите. Некои држеа транспарент на кој пишуваше: „Макрон, поднеси оставка“.
Околу 50 лица со качулки се обидоа да постават блокади на патиштата во Бордо, додека во Тулуз, на југозападниот дел од земјата, протестот беше брзо потиснат, но железничкиот сообраќај остана нарушен, изјави министерот за внатрешни работи Рејто за новинарите. Тој исто така рече дека низ целата земја се распоредени 80 000 безбедносни сили, вклучувајќи 6 000 само во Париз. Француските медиуми објавија дека се очекува околу 100 000 луѓе да учествуваат во демонстрациите.
Францускиот оператор на автопатишта ВИНСИ објави прекини во сообраќајот на автопатиштата низ целата земја, вклучувајќи ги Марсеј, Монпелје, Нант и Лион.
Движењето „Блокирај сè“ го одразува незадоволството на францускиот народ од нефункционалната владејачка елита која проповеда болно евангелие за штедење. Движењето потсетува на протестите на „Жолтите елеци“ од 2018 година, кои започнаа по зголемувањето на цените на горивата и прераснаа во пошироко движење против Макрон и неговите планови за економски реформи.