Од МВР додаваат дека денеска полициски службеници заедно со претставници на Министерството за здравство ќе извршат вонредни контроли во фабриките за производство на масло од канабис за медицински цели во околината на Кавадарци и Неготино
Министерството за внатрешни работи (МВР) информира дека полицијата во Неготино вчеравечер запленила околу 100 килограми висококвалитетна марихуана и привела три лица, притоа сечејќи канал за шверц на дрога.
Опишувајќи ја акцијата, од Министерството посочуваат дека вчера околу 20:00 часот на булeварот „Маршал Тито“ во Неготино полициски службеници дале наредба за запирање на возило „шкода октавија“ со скопски регистарски ознаки, но возилото не застанало.
Веднаш потоа било запрено патничкото возило „мерцедес“ со скопски ознаки, при што 37-годишниот Б. А. кој управувал со автомобилот, се обидел да избега, но набргу бил фатен. Во „мерцедесот“ полицијата пронашла четири патни торби со околу 100 килограми висококвалитетна марихуана, за која МВР вели оти најверојатно потекнува од фабрика за производство на масло од канабис за медицински цели.
„Набргу, по преземени мерки е пронајдено и запрено и возилото ‘шкода октавија’, кое го управувал М. А. (21), а совозач бил Н. А. (18), кое играло улога на претходница на возилото ‘мерцедес’“,
велат од МВР.
По судска наредба, полицијата подоцна извршила и претрес во домовите на тројцата приведени, а кај 21-годишниот М. А. биле пронајдени и одземени два пиштола, кои ги поседувал без дозвола.
Од Министерството додаваат дека денеска полициски службеници заедно со претставници на Министерството за здравство ќе извршат вонредни контроли во фабриките за производство на масло од канабис за медицински цели во околината на Кавадарци и Неготино.