„Ова е протест на оние кои си ја сакаат државата, ова не е протест на ниту една политичка партија. Додека тие ги полнат џебовите, ние ќе ги полниме улиците, сѐ додека не направиме функционална држава. Не сме само за да тажиме, туку гласно да порачаме: Кој е следен? Системот!“, порачаа демонстрантите од пред Владата
Собрани сме поради болка, неправда и трагедии кои можеа да бидат спречени ако институциите си ја вршеа работата, а одговорните сносеа одговорност и ако корупцијата не беше прифатена како нормална појава, порачаа дел од говорниците на собирот пред Владата. Активистот и студент Бленди Ходаи порача дека бараат промена на системот, но не козметичка, не привремена, туку вистинска, суштинска, системска промена.
„Премногу често забораваме, а народ што заборава ризикува трагедиите да му се повторат. Затоа од вечерва јасно кажуваме – нема веќе да заборавиме, нема веќе молк и нема повеќе страв. Нула толеранција кон корупцијата, нула молк. Ова е протест на чесните против корумпираните. Ова е протест на оние кои си ја сакаат државата, ова не е протест на ниту една политичка партија. Додека тие ги полнат џебовите, ние ќе ги полниме улиците, сѐ додека не направиме функционална држава. Не сме само за да тажиме, туку гласно да порачаме: Кој е следен? Системот!“
порача Ходаи во говорот.
Претходно говореше и млада студентка која повика на функционална држава, нагласувајќи дека не сака да ја напушти државата.
„Дозволивме да живееме во систем каде моќните владеат, а другите само страдаат. Дозволивме да живееме во општество каде правдата се мери со познанства, а животот може да зависи само од еден телефонски повик. Вака ли изгледа еднаквоста која треба да постои? Се среќаваме со неправди која станаа нормални, иако се далеку од праведни. Некои го кршат законот, а сепак никој не ги повикува на одговорност. Оставени на суровиот избор – телефонски повик или смрт. Се учиме дека ако сакаш да преживееш или ако сакаш да успееш, мора да играш според правилата на играта“,
порача студентката.
Со овие говори завршија демонстрациите на иницијативата „Кој е следен“.
Собирот почна со триминутен молк и ѕвездено небо на плоштадот „Македонија“, каде им беше оддадена почит на загинатите во трагедијата во Кочани.
Потоа, движејќи се по улицата пред републичкото Собрание, учесниците во маршот кога поминуваа пред болницата „Свети Наум Охридски“ со силен аплауз им оддадоа признание на здравствените работници.
Маршот продолжи по кејот на реката Вардар до зградата на Владата.