Неколкумина се обратија пред новинарите барајќи надлежните да не ги гонат оние што спасувале луѓе од запалениот објект
Молитва за здравје на повредените и мир и покој на загинатите во присуство на свештеници од Брегалничката епархија се одржа на вечерашниот собир во Кочани.
Стотици кочанчани се собраа на плоштадот кај паркот во центарот на градот за да им одадат почит на своите настрадани сограѓанин во страотниот пожар во дискотеката „Пулс“, но и да упатат порака до надлежните дека бараат правда.
Неколкумина се обратија пред новинарите барајќи надлежните да не ги гонат оние што спасувале луѓе од запалениот објект.
Се држеа транспаренти на кои пишуваше „Слобода за нашите херои“.
Од плоштадот полетаа десетици црни балони кон кочанското небо.
„Овој трагичен настан е последица на повеќе настани што се случуваат во континуитет не само во градот туку и во државата. Вчера младите, според мене на симболичен начин, го изразија тој гнев. Мора да се каже со име и презиме секој што носи титула и што е крив“,
рече еден од присутните на протестот.
Негов сограѓанин додаде дека Кочани е мртов град.
„После сè што ни се случи ги замолувам сите од Скопје, началници, обвинители, многу е лесно вие да направите хајка и чистка на сите нас тука. Тоа ви е најлесно за да си ги исперете вашите работи, да покажете колку сте големи обвинители. Целата ваша неспособност треба сега да ја истуриме на Кочани и ние да бидеме криминалците. Не, бе, луѓе, ние сме жртви“,
додаде тој.
По молитвата граѓаните мирно се разотидоа, на што повика и митрополитот брегалнички, г. Иларион.