Спомен-обележјето во кругот на СВР Куманово беше откриено по повод одбележувањето на 22 години од формирањето на Единицата за брзо распоредување чии припадници беа дел од загинатите македонски полицајци во настаните во Диво Насеље пред повеќе од осум години
Во кругот на објектот на Секторот за внатрешни работи Куманово денеска беше откриено спомен обележје во чест на загинати припадници на македонската полиција во настаните во кумановската населба Диво Насеље кои се случија на почетокот на мај 2015 година.
Тогаш во дводневна престрелка со терористичка група загинаа осум припадници на Единицата за брзо распоредување (ЕБР) и на Специјалната антитерористичка единица „Тигар“.
Спомен-обележјето беше откриено по повод одбележувањето на 22 години од формирањето на Единицата за брзо распоредување.
Откривањето на споменикот го изврши министерот за внатрешни работи Оливер Спасовски во присуство на семејствата на загинатите припадници на ЕБР и САЕ „Тигар“, највисокото раководство на МВР, СВР Куманово, претставници на Македонскиот полициски синдикат, претставници од Општина Куманово, политички партии, колеги и претставници од Одделот за специјални полициски операции.
Министерот Спасовски, делегациите и присутните оддадоа почит кон припадници на македонската полиција кои загинаа во Диво Насеље и положија свежо цвеќе на споменикот подигнат во нивна чест и сеќавање.
„Никогаш нема да се заборави оној кобен мај 2015 година, кога осуммината припадници на МВР овде, во Куманово, го покажаа врвот на патриотизмот, жртвувајќи ги своите животи во вооружениот терористички напад во Диво Насеље“,
рече министерот Спасовски.
После тој ден, додаде Спасовски, ништо не е исто за семејствата, за другарите и колегите од Специјалната антитерористичка единица „Тигар“ и од Единицата за брзо распоредување чии припадници беа загинатите.
„Бидејќи болката никој не може да ја залечи, а длабоката почит кон нив останува засекогаш. Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ се нашите херои кои го дадоа својот живот за нешто поголемо од себе. А нема ништо поблагородно од жртвувањето на животот за својата татковина. И знам дека ова знаме на јарболот, наше, македонско не се вее од ветрот, туку од последниот здив на секој наш припадник кој загинал, чувајќи го!”,
рече министерот Спасовски потенцирајќи дека спомен-обележјето е направено заедно со Македонскиот полициски синдикат, се наведува во соопштението на МВР за настанот.
Спомен-плочата, како што рече министерот за внатрешни работи, е обележје дека хероите живеат вечно.
„Ова спомен-обележје нека ја пренесе пораката за длабока почит, љубов кон татковината, мир и соживот за сите идни генерации. Споменот на нашите херои никогаш да не биде избришан од меморијата на времето. Хероите живеат вечно – нека им е вечна слава!”,
рече министерот Спасовски.
За настаните од Диво Насеље со затворски казни осудени се вкупно 33 лица, а ослободителни пресуди добија четири лица. Судскиот процес се водеше за кривичните дела тероризам и терористичка организација. Првично, во постапката беа опфатени 29 лица, а подоцна случајот се спои со предметот „Молња“ каде имаше уште осум лица кои се гонеа како помагачи на вооружената група.
Првостепената пресуда Основниот кривичен суд ја донесе на 2 ноември 2017, а истата во јули 2019 беше потврдена и од Апелација. Од 33 лица кои беа прогласени за виновни седум добија доживотен затвор; 13 се осудени по 40 години затвор; шестмина по 20 години; еден 18 години; двајца 14 години; двајца 13 години; двајца 12 години затвор. За пресудата одбраната се жалеше и до Врховниот суд, кој седница одржа во јули 2021 година, а одлуката со која највисокиот суд ги потврди пресудите беше објавена на почетокот на јануари 2022 година.
Настаните во кумановско Диво Насеље се случија на 9 и 10 мај 2015 година.