Едно лице го загуби животот во големото невреме што го зафати северниот и североисточниот дел на грчкиот остров Крит. Спасувачките екипи трагаат по исчезната жена, а над 30 лица биле спасени, според последните информации од портпаролот на противпожарната служба на Грција Јоанис Артопиос.
Невремето ги погоди регионите Ираклио и Ласити, а во приморското место и туристичка дестинација Агиа Пелагиа од автомобил заглавен во надојдените води било извлечено безживотното тело на 50-годишен маж, а живи биле пронајдени две жени.
Според Артопиос, во делот на Агиа Пелагиа во тек е потрагата по исчезната жена, а не постојат пријави за други исчезнати. За само еден час центарот за операции на противпожарната служба примила 453 повици за помош, додека пак спасувачки екипи на безбедно место префриле вкупно 30 лица, од кои девет биле во археолошкиот локалитет Ситиа, меѓу кои и две деца.
Портпаролот на противпожарната служба на Грција кажа дека вечерва невремето се префрлило во источниот дел на Крит, а обилни врнежи има и на островите Карпатос и Касос.
Токму до жителите на овие два острови, како и до оние што се на Родос, Кастелоризо и Халки од бројот за итни случаи 112 попладнево била испратена порака за можни опасни временски појави во следните 24 часа, со препорака да се избегнуваат непотребни движења.