Новото издание на емисијата „360 степени” се емитува вечерва (29 јануари 2024 г.) од 20:15 часот на МРТ 1
Во просториите на МВР само што започна снимањето на интервјуто со новиот министер за внатрешни работи во штотуку избраната техничка влада, Панче Тошковски, кое ќе се емитува во вечерашново издание на емисијата „360 степени“ на МРТ 1. Со Тошковски, кој е кадар на ВМРО-ДПМНЕ, веднаш по примопредавањето со Оливер Спасовски, разговараме за тоа како тој (Тошковски) стана министер за внатрешни работи, со оглед на јасните сигнали дека за оваа позиција се подготвуваше Наќе Чулев и како го коментира ставот на СДСМ дека клучна била пријателската релација со Христијан Мицкоски.
Го прашуваме и каков однос ќе има со премиерот Талат Џафери, дали ќе оди на владини седници, ги знае ли 15-те позиции во МВР на кои ќе направи смена, каков однос очекува со дополнителниот заменик-министер од СДСМ, Митко Бојмацалиев, какви му се плановите за процесот на замена на личните документи (особено на пасошите), има ли политичка/министерска амбиција ако по изборите ВМРО-ДПМНЕ е дел од новата влада…
Емисијата се емитува од 20:15 часот на МРТ 1.