Во билтенот на Царината за оваа недела се наведени и заплени на поголемо количество девизи, во износи од по десетици илјади евра, како и поголемо количество автомобилска опрема и делови
Освен обиди за шверц на производи, бил спречен и нелегален влез на мигранти кои биле сокриени во просторот за палети на товарно возило
Семки и масло од канабис, женска долна и ноќна облека со логотипот на познатите брендови „Викторија сикрет“ и „Гучи“, како и значителна количина цигари се дел од предметите и производите што царинските службеници и мобилните тимови на оваа институција неделава спречиле да бидат прошверцувани во и надвор од државата.
Обидите за шверц, како што информираа денеска од Царинската управа, биле откриени во неколку одвоени случаи.
Така, 14 семки од канабис и 0,5 грама масло од канабис биле откриени кај патник од САД, кој преку Меѓународниот аеродром „Скопје“ нелегално се обидел да ги внесе во државата.
На истиот граничен премин на скопскиот аеродром, царинските службеници спречиле во земјава да бидат прошверцувани 400 парчиња женска долна и ноќна облека со потписот на „Викторија сикрет“ и „Гучи“, а во друг случај кај македонски државјанин, кој требало да патува за Лондон, биле пронајдени три илјади парчиња цигари и еден килограм тутун, сокриени во личниот багаж на патникот.
Ова, според Царината, не се единствените откриени случаи во текот на оваа недела.
Освен обиди за шверц на производи, бил спречен и нелегален влез на мигранти.
„Царински службеници на граничен премин Богородица спречија нелегален влез на тројца илегални мигранти, државјани на Египет. Мигрантите се откриени при контрола на товарно моторно возило каде биле скриени во просторот за палети“,
се наведува во соопштението.
Дополнително, при проверките цариниците спречиле и шверц на 850 парчиња играчки поради основано сомнение дека се работи за повреда на право од интелектуална сопственост.
Музички инструменти, аудиоопрема и друга електроника се запленети во три одвоени случаи на влез во државата на граничните премини „Табановце“ и на Меѓународен аеродром „Скопје“, а чија вредност се проценува на околу 740 000 денари или околу 12 000 евра.
„Во првиот случај, откриен на граничниот премин ‘Табановце’, во багажникот биле откриени 5 музички инструменти (вклучувајќи синтисајзери, кларинет и саксофон), машина за перење и компјутерски монитор со вредност од 588.833 денари. Во вториот случај, откриен исто на ‘Табановце’, мобилен царински тим заплени употребувана аудио опрема скриена во автомобил. Во третиот случај, на Меѓународен аеродром ‘Скопје’, царинските службеници открија електрични тапани и аудиоопрема ‘Роланд“ (Roland)“,
велат од Царинската управа.
Во билтенот на Царината за оваа недела се наведени и заплени на поголемо количество девизи, во износи од по неколку десетици илјади евра, како и поголемо количество на автомобилска опрема и делови кои биле откриени на граничните премини „Табановце“ и „Блаце“ на влез во државата.