Техничкиот премиер изјави денеска во Прилеп дека ќе нема митинзи пред изборите на 15 јули, освен мини-средби со граѓани доколку се процени дека има услови
Има начини и во време на пандемија да допреме до гласачите. Нема да има митинзи, а најважно е политичарите да пратат порака дека се почитуваат мерките, изјави техничкиот премиер Оливер Спасовски, при денешната обиколка на Прилеп
„Има медиуми, има социјални мрежи, има разни иновативни начини преку кои може да дојдеме да ги соочиме политичките концепти, а сепак тоа да биде безбедно за сите нас, за граѓаните. Секако, таму каде што ќе се процени дека може да се направат мини – средби со почитување на сите мерки на дистанца и носење на опрема ќе го направиме и тоа, средби со целни групи, посебни информации за претставување на програмата на политичките субјекти…Значи, сите опции кои ни стојат на располагање во времето на оваа пандемија ќе бидат искористени за да се доближиме, што е можно повеќе до граѓаните“,
рече Спасовски.
Тој нагласи дека најбитна е пораката што ќе ја испратат политичарите дека се почитуваат мерките, за сите да го прават тоа.
„Најважно е оние кои излегуваат во кампањата да не ги гледаме на слики какви што ги видовме завчера од некакви собири на опозициски партии, на кои сите заедно се гушнати и без маски. Со тоа праќаат порака дека не треба да ги почитуваат мерките. Одговорноста на политичарите е најголема во оваа држава, зашто ако сакаме сите други тоа да го почитуваат, тоа треба ние први да го правиме“,
изјави Спасовски.
Техничкиот премиер, заедно со министерот за здравство Венко Филипче, беше денеска во Прилеп и во Крушево. Во Прилеп тие беа во обиколка на новоизградениот Ургентен центар и реновираното акушерско одделение во рамки на болницата.
„Здравствената криза со коронавирусот повеќе од кога и да е покажа колку е важно здравствениот систем да биде цврст. Затоа, во овој период, континуирано вложуваме и во зајакнување на здравствениот систем. Создадовме ресурси, сериозно надграден здравствен систем во однос на капацитетите за сместување, медицинската опрема и знаењата на здравствените работници, за да се справиме и со актуелниот бран на коронавирусот. И во оваа пригода, повторувам: Вирусот ќе го победиме со многу дисциплина и безусловно почитување на мерките“,
рече Спасовски.
