Екипи од ЈП Улици и патишта интервенират во расчистување на разрушениот потпорен ѕид во должина од 30-тина метри
По обилните врнежи од дожд коишто попладнево го зафатија и Скопје, во населбата Пинтија се урна потпорен ѕид на булеварот „Борис Трајковски“.
Од Град Скопје соопштија дека екипите на ЈП Улици и патишта веднаш интервенирале и вршат расчистување на теренот.
Оттаму информираа дека се работи на отстранување на градежниот шут кој е настанат како последица на разрушувањето на потпорниот ѕид, за истиот да не преставува опасност при движењето на возилата.
Дежурните екипи се на терен и вршат и контрола на светлосната сигнализација, се врши увид во потенцијални дефекти и нивна санација.
Градоначалникот на Кисела Вода, пак, Орце Ѓорѓиевски на својот Фејсбук профил попладнево најави дека ќе бидат спроведени инспекции за да се испита квалитетот на изградбата на потпорните ѕидови.
„Во периодот што следи ќе биде извршена детална проверка на сите градби кои се направени во минатото, со цел да утврдиме дали можат да одговорат на временските неприлики кои и понатаму ќе се случуваат но и онаму каде што има потреба од дополнителни зафати да делуваме, затоа што безбедноста на моите сограѓани е приоритет. Покрај тоа, сакам да најавам дека во наредниот период ќе бидат извршени детални контроли од инспекциските служби за квалитетот на изградба на потпорните ѕидови и на приватните парцели, особено онаму каде што теренот е стрмен. Таму каде што ќе биде утврдено дека се направиле недостатоци при градењето од различни причини, во наредниот период ќе прецизираме како ќе постапиме“,
напиша Ѓорѓиевски на Фејсбук.
Ѕидот што се урна во Пинтија беше изграден кога се прошируваше тогашната улица Првомајска во булевар Борис Трајковски во времето на ексградоначалникот на Град Скопје, Коце Трајановски.