Потегот на претседателот следува откако активистот Суад Мисини вчера пред зградата на Собранието почна штрајк со жед поради, како што објави, нерешавањето на проблемот со фантомите, односно лицата без документи. Тој утринава го посетил Мисини во паркот „Жена борец“ кај Собранието информирајќи го за потпишаниот Указ на Законот
Шефот на државата Стево Пендаровски објави дека го потпишал Указот на измените на Законот за матична евиденција, со што над 600 граѓани во земјава ќе можат да добијат лични документи. Воедно, секое родено дете во земјава ќе може да добие извод на родени, без разлика дали неговите родители имаат или не лични документи.
Потегот на Пендаровски следува откако активистот Суад Мисини вчера пред зградата на Собранието почна штрајк со жед поради, како што објави, нерешавањето на проблемот со фантомите, односно лицата без документи.
Претседателот утринава го посетил Мисини во паркот „Жена борец“ кај Собранието информирајќи го за потпишаниот Указ на Законот за матична евиденција.
„Потребно е што е можно поскоро да се направат измени и во Законот за живеалиште и престојувалиште, со што ќе се овозможи на уште една ранлива категорија граѓани да извадат лични документи. Дополнително, пратениците во Собранието кои веќе работат на овој процес, да го завршат час поскоро, затоа што секој човек има право на достоинствен живот“,
му рекол, меѓу другото, шефот на државата на Мисини.
Активистот Суад Мисини минатата недела се обрати до јавноста, пред сè до претседателот на државата, премиерот и претседателот на Собранието, барајќи да се изгласаат сите потребни закони за, како што рече, да се стави крај на агонијата на сите т.н. фантоми во земјава, односно луѓе без лични документи.
„Доколку ова прашање не се затвори до 19.06.2023 (понеделник), истиот ден ќе започнам безусловен и неограничен штрајк со жед, кој ќе трае сè до решавање на овој проблем. Или до нерешавање. А тоа, според медицинската наука трае најмногу до три дена. Ако така решат најмоќните, нема да трае долго“,
напиша Мисини во објавата на Фејсбук во која најави дека ќе стапи во штрајк со жед.
Најавата дека ќе штрајкува со жед, Мисини ја објави непосредно по смртта на 21-годишниот Мемет Камбер – продавач на списанието „Лице в лице“, кој почина на Клиниката за анестезија, реанимација и интензивно лекување (КАРИЛ). Камбер не поседувал здравствена книшка и немал можност да прави здравствени прегледи.