Посетата на еврокомесарката за проширување Марта Кос на земјава е по повод утрешната лидерска средба ЕУ-Западен Балкан во Скопје на која ќе се разговара за Планот за раст
Министерот за надворешни работи и надворешна трговија Тимчо Муцунски попладнево на скопскиот аеродром ја пречека еврокомесарката за проширување Марта Кос, која денеска и утре ќе престојува во земјава.
Нејзината посета на земјава е по повод утрешната лидерска средба Европска Унија – Западен Балкан која се одржува во Скопје и на која ќе се разговара за Планот за раст.
„На состанокот на лидерите од ЕУ и Западен Балкан, фокусот ќе биде ставен на Планот за раст, реформската агенда, како и на предизвиците со кои се соочуваат нашата држава и регионот на патот кон полноправно членство во ЕУ“,
информира министерот за надворешни работи во објава на Фејсбук.
Муцунски најави дека денеска тој и премиерот Христијан Мицкоски ќе остварат средба со Кос, потенцирајќи дека за Владата евроинтеграциите не се само декларативна заложба, туку јасна стратегиска определба.