Додека на вечерашниот митинг во Кавадарци, кандидатот за нов градоначалнички мандат зборуваше за реализирани и планирани проекти во општината, лидерот на ВМРО-ДПМНЕ и во оваа прилика зборуваше против Преспанскиот договор
Јанчев го почна обраќањето со честитка за роденденот на Мицкоски, нарекувајќи го нашиот лидер, а потоа рече дека подарокот ќе биде изборна победа
Лидерот на ВМРО-ДПМНЕ Христијан Мицкоски го заврши третиот ден од кампањата со митинг во Кавадарци, каде што му даде поддршка за нов мандат за градоначалник на Митко Јанчев, кој беше разрешен од потпретседателската функција во партијата за време на превирањата околу поддршката за Преспанскиот договор.
И покрај речиси тригодишните искричења меѓу нив, Јанчев и Мицкоски „ги закопаа секирите“ во ова предизборие, така што досегашниот кавадаречки градоначалник доби поддршка од раководството на опозициската партија за уште една кандидатура.
На вечерашниот митинг во Кавадарци, Јанчев зборуваше за реализираните проекти во изминатите четири години, а за наредните четири вети, меѓу другото, зоолошка градина во градот и изградба на обиколница. Тој го почна обраќањето со честитка за роденденот на Мицкоски, нарекувајќи го нашиот лидер, а потоа рече дека подарокот ќе биде изборна победа. Мицкоски, пак, и во оваа прилика се осврна на промената на името на државата.
„Зоран Заев предавството го објаснува како храбар чин. Не е храброст да направиш глупост од која ќе страдаат народот и државата, но Заев не ја знае разликата. Со реченицата дека ниеден челник немал храброст да го реши спорот, Заев ги обвини Глигоров, Црвенковски и останатите дека немале храброст да го предадат најскапоценото, македонското достоинство и името. Епа Заев сети се зошто никој не го потпиша тоа што ти го потпишуваше“,
истакна Мицкоски.
Лидерот на СДСМ, Зоран Заев, пак, вечерва на митинг во родната Струмица, рече, меѓу другото, Мицкоски сака да се врати во минатото и дека затоа зборува за поништување на Преспанскиот договор и на Договорот за добрососедство.