По три одиграни натпревари во рамките на квалификациите за Еуро 2024 македонската фудбалска репрезентација има само една победа против Малта и два порази, од Украина и вечерашниот од Англија. Следниот натпревар од македонските фудбалери го играат со селекцијата на Италија на 9 септември во Скопје
Македонската фудбалска репрезентација го доживеа најтешкиот пораз во својата историја откако вечерва на „Олд Трафорд“ во Манчестер загуби од домаќинот Англија со резултат 7:0. Натпреварот се играше во рамките на квалификациите за Европското првенство „Еуро 2024“.
Избраниците на селекторот Благоја Милевски беа немоќни против силниот противник. Македонските фудбалери во текот на целиот натпревар не создадоа ниту една шанса да го загрозат голот на домаќинот, а дури седум пати ја вадеа топката од сопствената мрежа.
На домаќините им беа потребни 29. минути да ја разбијат одбраната на македонската репрезентација, а серијата погодоци што уследи потоа ја отвори Хари Кејн. До крајот на првото полувреме во листата на стрелци за „Гордиот Албион“ се запишаа Букајо Сака и Маркус Рашфорд.
За само шест минути игра во вториот дел од натпреварот, Сака успеа да ја погоди нашата мрежа уште два пати, постигнувајќи хет-трик.
Резултатот на 6:0 во 64. минута го зголеми Калвин Филипс, а точка на натпреварот стави Хари Кејн со гол од пенал во 73. Минута.
По три одиграни натпревари македонската фудбалска репрезентација има само една победа против Малта и два порази, од Украина и вечерашниот од Англија.
На првиот денешен натпревар од Ц-групата, Украина беше подобра од Малта, совладувајќи ја со 1:0.
Англија е прва на табелата со максимални 12 бода од четири средби, Украина е втора со шест бода од три натпревари, а Италија се наоѓа на третата позиција со три бода од два меча. По двата порази овој месец Македонија падна на четвртата позиција со три бода од три средби. Последна е репрезентацијата на Малта, која е без освен бод од четири меча.
Следниот натпревар од квалификациите за Еуро 2024 македонската репрезентација го игра со селекцијата на Италија на 9 септември во Скопје.