Низ просториите на Македонската филхармонија за време на комеморацијата прозвучи и песната „Somewhere over the rainbow“, која, посветена на Попов, ја изведе хрватскиот бенд „Ниплпипл“
Елегична музика со англиска поезија во заднина, фотографии кои се емитуваа на проектор, емотивни говори и аплауз, многу познати лица од културниот живот во земјава, урбани ликови, министри. Ова беше дел од атмосферата на малата сцена во Македонската филхармонија во Скопје каде што денеска се одржа комеморација на еден од највлијателните музичари, диџеи и артисти во земјава – Мирко Попов.
На комеморацијата за Попов, кој почина минатата недела на 51-годишна возраст, присуствуваа негови многубројни соработници, музичари, артисти, пријатели и колеги за да се поздрават и да му оддадат последна почит.
Во улога на модератор на комеморацијата беше театарскиот режисер Синиша Ефтимов кој, обидувајќи се да ги задржи солзите во повеќе наврати, раскажа нешто повеќе за Мирко – каков човек бил, колку направил и со што придонел во развојот на македонската музика и култура.
„Ви благодариме што дојдовте заедно да му оддадеме почит на еден од највлијателните и најуспешни скопски композитори, текстописци, диџеи, издавачи и продуценти – Мирко Попов, кој, за жал, прерано нè напушти минатата недела“,
порача Ефтимов на почетокот на настанот.
Покрај Ефтимов, за ликот и делото на Мирко Попов говореа и писателката Билјана Црвенковска, музичарот Александар Гавровски, Филип Николовски од Младинскиот културен центар (МКЦ). Меѓу присутните на денешната комеморација во Македонската филхармонија беа и министерката за култура Бисера Костадиновска-Стојчевска и првиот вицепремиер Бојан Маричиќ.
„Слободно аплаудирајте, Мирко го сакаше аплаузот. Оние што сте излезени од работа, јавете дека ќе задоцните“,
беа, меѓу другото, зборовите што режисерот Ефтимов ги упати кон присутните.
Во текот на целиот настан на видеопроектор се емитуваа фотографии од Попов во придружба на своето семејство, пријателите и соработниците. На видеобимот се прикажаа и снимки испратени од голем број македонски, регионални и светски музичари и артисти кои зборуваа за Попов и за последен пат се збогуваа со него.
Низ просториите на Македонската филхармонија за време на комеморацијата прозвучи и песната „Somewhere over the rainbow“, која, посветена на Мирко Попов, ја изведе хрватскиот бенд „Ниплпипл“.
Џез-музичарите Владан и Павел Дробицки имаа свој настап во живо, а комеморацијата беше заокружена со изведба на песната „Аfter hours“ на „ПМГ колектив“.
Мирко Попов почина на 24 март по кусо боледување.
Тој ќе остане запаметен како професионален диџеј и човек кој ја формира дискографска куќа „ПМГ рекордингс“. Беше дел од култниот електро-џез состав „Кантон 6“. Автор е на книгите „20 години те сакам“ и книгата за деца „Розовата планета”. Беше и музички новинар и организатор на многу културни настани во МКЦ. Попов ќе остане запаметен како некој што успеа да ја развие и да ја донесе електронската музика во Македонија.