Без осветлување, еден час, остана и претседателската вила „Водно“
По примерот на повеќе светски метрополи и Скопје “потона“ ноќва во едночасовен мрак по повод „Часот на планетата Земја.
На повеќе локации во Скопје, особено во центарот на градот, во 20.30 часот беа исклучени светилките, како дел од акцијата во која се вклучени 8 000 града во преку 180 држави ширум светот.
Без осветлување останаа претседателската вила „Водно“, Владата, плоштадот „Македонија“, сите објекти и мостови низ кејот на Вардар, тврдината Кале, Порта „Македонија“, како и парковите во општините Аеродром и Карпош.
И оваа година акцијата се одбележува виртуелно, со одржување на првата дигитална климатска конференција во земјава под мотото „Дали природата го возвраќа ударот?“.
„Часот на планетата Земја“ започна како симболичен настан во Сиднеј во 2007 година, а сега се одбележува во повеќе од 180 земји и територии како глобален момент на солидарност за планетата. Како што акцијата ќе патува низ часовните зони, милиони луѓе ширум светот виртуелно ќе се обединат во испраќање на порака за солидарност со проблемите со кои се соочува планетата Земја.
