Група граѓани попладнево со собир пред Собранието побараа „слобода и правда“ за обвинетите за упадот во Собранието на 27 април 2017 година
Со транспаренти „Не требаше ни ден да бидат во затвор, а не со години“ и „Од тој 27 до денес искрвави Македонија, тие се обидоа да го спречат тоа, слобода за нашите браќа“, група граѓани попладнево со собир пред Собранието побараа „слобода и правда“ за обвинетите за упадот во Собранието на 27 април 2017 година.
За „крвавиот четврток“ во 2017 година беа обвинети 33 лица, од кои, во пресрет на потпишувањето на Преспанскиот договор со Закон за амнестија, беа помилувани 15 лица, меѓу кои и петмина пратеници од коалицијата на ВМРО-ДПМНЕ. За 16 осудени за кривичното дело тероризам судот донесе пресуда со вкупно 188 години затвор.
Другиот предмет се однесуваше на организаторите на упадот, за кои во 2021 година Основниот кривичен суд Скопје изрече 25 години затвор. Станува збор за поранешните функционери Трајко Вељаноски, Миле Јанакиески, Спиро Ристовски и поранешниот директор на УБК, Владимир Атанасовски.
Апелацискиот суд годинава ја укина првостепената пресуда и овој предмет беше вратен на повторно судење. Оттаму посочија дека Основниот кривичен суд требало во поголема мера да го разгледа прашањето за одредбите кои се однесуваат за амнестија на кривичното гонење.
Во меѓувреме, опозициската партија ВМРО-ДПМНЕ неодамна побара амнестија за осудените, предлог-закон кој поради недоволен број гласови не помина во Собранието.