Од собирот пред Владата, меѓу другото, се обрати деканот на ФИНКИ, професорот Боро Јакимовски, кој посочи на проблемот со кој се соочува Факултетот во изминатите години во однос на организација на наставата и распределбата на повеќе од пет илјади студенти кои ја следат наставата од осум различни објекти
„ФИНКИ нема зграда – учиме пред Влада“. Под ова мото студентите на Факултетот за информатички науки и компјутерско инженерство денеска излегоа на протест пред зградата на Владата, а таму симулираа импровизирана училница со цел да укажат на долгогодишниот просторен проблем со кој се соочува ФИНКИ.
Во друштво на студентите на денешниот протест беше и раководството на Факултетот.
Од собирот пред Владата, меѓу другото, се обрати деканот на ФИНКИ, професорот Боро Јакимовски, кој посочи на проблемот со кој се соочува Факултетот во изминатите години во однос на организација на наставата и распределбата на повеќе од пет илјади студенти кои ја следат наставата од осум различни објекти.
„Наставата се одржува во осум различни објекти, се одржува од 8 часот наутро до 9 часот навечер. Максимално вложуваме во постојните објекти коишто се наоѓаат во техничкиот кампус за нивна адаптација, бидејќи истите, сепак, припаѓаат на други факултети и имаат потреба од адаптација“,
рече Јакимовски.
Според деканот на ФИНКИ, додека не се изнајде трајно решение за проблемот, она што може да се направи е на Факултетот за користење да му се отстапат просториите на Бирото за развој на образованието (БРО).
„Ние сме максимално флексибилни изминатите 13 години. Се надеваме на сите ветувања што сите влади ни ги дале. Некои се исполнети, но, секако, сметам дека пред нас имаме најголем факултет во државата којшто ги запишува најдобрите матуранти, тоа се наши деца кои студираат на факултетот и мислам дека треба државата максимално да направи напори да ги подобри условите“,
додаде првиот човек на ФИНКИ.
Денешниот протест на ФИНКИ беше поддржан од неформалната организација Студентска револуција, а следуваше по заклучоците кои Факултетот ги усвои во однос на барањето за отстапување и времено или трајно користење на просториите на Бирото за развој на образованието.
Во однос на барањата за отстапување на просториите на БРО, претходно денеска реагираа од Бирото. Оттаму преку писмено соопштение порачаа дека ги поддржуваат барањата и заложбите на ФИНКИ за решавање на долгогодишниот просторен проблем со кој се соочуваат, но и нагласија дека Факултетот не може да го решава овој проблем со преземање на нивните простории.