„Полицајците дојдоа први и тие ја разбиваа вратата. Едниот полицаец е повреден, во болница е. Имаше една жена, која ја изнесоа на раце, и уште едно лице од другата страна кое не може да се движи и него го изнесоа на време. А каде што е пожарот, двајцата во последен момент ги спасија“, сведочи станар на погодената зграда
На улицата „Петар Делјан“ во Кисела Вода, на само 50 метри од објектот на Општината, каде што синоќа избувна пожар во еден стан од зградите, денеска животот се одвива редовно. Во пожарот беа повредени две лица кои биле во станот, како и еден полицаец и еден пожарникар што интервенирале изминатата вечер на терен.
Како што раскажува еден од станарите, сè се случило набрзина, еден час пред полноќ.
„Околу 23 часот, синот кој беше кај мене на гости свика – тато, пожар има. Јас спиев. Велам – како пожар? Кога излеговме, веќе беше проширен. Го имаа пријавено соседите, а после 25 минути дојдоа пожарникарите со едно возило, па уште едно. Полицајците дојдоа први и тие ја разбиваа вратата. Едниот полицаец е повреден, во болница е. Имаше една жена, која ја изнесоа на раце, и уште едно лице од другата страна кое не може да се движи и него го изнесоа на време. А каде што е пожарот, двајцата во последен момент ги спасија“,
раскажува станарот од зградата во која се случи пожарот.
Тој вели дека била пронајдена стопена пластична маса до боца, која најверојатно служела за кислородна поддршка на еден од жителите во погодениот стан.
„Некоја пластична маса најдоа. Стопена беше и до неа најдоа боца. Таа боца беше за кислородна поддршка, човекот беше со тешки здравствени проблеми, едвај се качуваше по скалите. Најверојатно за дишење му беше боцата“,
дополнува неговиот комшија.
Се гаснело до 2 часот по полноќ.
„Сите беа евакуирани. Кога пожарникарите веќе се качија горе, тогаш ги извадија и ги видовме двајцата надвор дека се живи. Жената беше целата црна, мажот покажа со рака дека е жив“,
рече станарот од улицата „Петар Делјан“ во Кисела Вода.
Тој потврди дека на еден од пожарникарите му се слошило затоа што вдишал чад и побарал млеко, а сопругата на нашиот соговорник „заработила“ скршеница на раката брзајќи да донесе помош за пожарникарот.
Градоначалникот на Кисела Вода, Орце Ѓорѓиевски, меѓу првите синоќа информира за пожарот. Тој посочи дека жителите на зградата биле евакуирани оттаму и пренесени во неговиот кабинет.
„Веднаш со мојот тим се упативме на местото на настанот. Оваа ноќ ќе ја поминеме заедно, ќе најдеме и преноќиште, а уште рано наутро ќе помогнеме со сите расположливи ресурси и оваа трагедија заеднички ќе ја надминеме. Заеднички ќе најдеме решение за сѐ ова, мојот народ не го оставам на милост и немилост“,
напиша Ѓорѓиевски синоќа во објава на Фејсбук.
Градоначалникот на Кисела Вода им се заблагодари на станарите за смиреноста, а благодарност упати и до екипите на скопската противпожарна единица и до припадниците на МВР.