Ван дер Белен го посети и Капан ан, а се запозна и со родното место на Мајка Тереза и со придонесот на нашата држава во негувањето на универзалните хумани вредности за кои се залагаше оваа светица. Делегацијата беше информирана и за историјата на Камениот мост, а го посети и Даут-пашиниот амам, каде што се запозна со дел од македонската современа уметност
Претседателот на Австрија, Александер Ван дер Белен, кој е во официјална посета на Република Северна Македонија, во придружба на министерката за култура Бисера Костадиновска-Стојчевска, вечерва ја посетија Старата скопска чаршија.
Фотографиите од прошетката ги објави министерката Костадиновска-Стојчевска на својот фејсбук профил каде напиша дека „Св.Спас“ во Скопје, Мурат-пашината џамија, Старата скопска чаршија, Галеријата на Даут Пашиниот амам со сета негова убавина, се дел од традиционалните вредности, и современата македонска култура со која претседателот на Австрија, Александер Ван дер Белен, со сопругата и со високата австриска делегација се запознаа во нашата земја.
„За време на кратката прошетка, австрискиот претседател имаше можност да се запознае со повеќе сегменти од историското минато и со културно-историските споменици градени низ вековите околу овој потег на градот“,
соопштуваат од Министерството за култура.
Костадиновска-Стојчевска и Ван дер Белен го посетија и Капан ан, а претседателот на Австрија се запозна и со родното место на Мајка Тереза и со придонесот на нашата држава во негувањето на универзалните хумани вредности за кои се залагаше оваа светица. Делегацијата беше информирана и за историјата на Камениот мост, а го посети и Даут-пашиниот амам, каде што се запозна со дел од македонската современа уметност.
Костадиновска-Стојчевска го информираше австрискиот претседател дека во престижниот простор Кунстхале во Виена (кој е дел од „Музеум Квартиер“), еден од најголемите европски културни центри, на 20 април ќе биде отворена изложба со дела од вредната колекција на Музејот на современата уметност од Скопје.
„Оваа изложба, која е работена во соработка со престижниот виенски музеј и со светски познати куратори, дава нова светлина во соработката во областа на културата помеѓу двете земји, кои традиционално одржуваат добри односи, и е патоказ кој нуди нови можности за натамошната соработка, користејќи ги современите движења“,
рече Костадиновска-Стојчевска.
Таа упати покана, претседателот на Австрија со своите соработници да присуствува на свеченото отворање на оваа изложба, која е резултат на соработката меѓу уметничките институции на Северна Македонија и на Австрија.
Сојузниот претседател на Република Австрија Александер ван дер Белен, кој денеска беше пречекан од министерката Костадиновска-Стојчевска на граничниот премин „Ќафасан“, утре во вила „Водно“ ќе има средба со неговиот домаќин претседателот Стево Пендаровски, по што ќе следи пленарен состанок на делегациите на Северна Македонија и Австрија.
Покрај со неговиот домаќин Пендаровски, тој ќе се сретне и со претседателот на Собранието Талат Џафери и со премиерот Димитар Ковачевски, а ќе има и обраќање пред пратениците во Парламентот.