Од Форумот на жени на СДСМ, во соопштението застануваат во одбрана на нивниот сопартиец Маричиќ за кој велат дека бил и е борец за родова еднаквост, промотор на рамноправноста и силен поддржувач на македонските прогресивни и демократски политики
Форумот на жени на СДСМ денеска на прес-конференција во Собранието реагираше за случувањата на собраниската седница за пратенички прашања. Оттаму велат дека е недозволиво да се злоупотребува собраниската говорница за изнесување лаги, тоа, велат од Форумот на жени на СДСМ, граѓаните не го заслужуваат.
„Секојдневно ги слушаме лагите на Дафина Стојаноска кажани од собраниската говорница. Ваквото однесување на пратеничката која не штеди отровни зборови се спротивни на вредностите и заложбите на женското пратеничко лоби и не се во интерес на македонскиот парламент“,
рече Лолита Ристова, пратеничка на СДСМ.
Од Форумот на жени на СДСМ застанаа во одбрана на нивниот сопартиец Маричиќ за кој велат дека бил и е борец за родова еднаквост, промотор на рамноправноста и силен поддржувач на македонските прогресивни и демократски политики.
На денешната собраниска седница за пратенички прашања, пратеничката од ВМРО-ДПМНЕ Дафина Стојаноска од говорницата го обвини вицепремиерот за европски прашања Бојан Маричиќ дека ѝ праќал бакнежи и намигнувања.
Во тој момент потпретседателот на Собранието, Горан Мисовски, кој претседаваше со седницата за пратенички прашања проба да ја смири ситуацијата, по што Стојановска и уште неколку пратенички реагираа до Мисовски за тој повторно да ѝ дозволи да говори.
По ова, Маричиќ се огласи на Фејсбук за да демантира. Во неговата реакција се вели дека најостро ги демантира, какошто вели, недостојните и ниски лаги на пратеничката Дафина Стојаноска.
„Со пратеничката ниту сум имал било каква комуникација ниту сум ѝ испратил било каква вербална или гестикулативна порака“,
напиша Маричиќ.
Пратеникот од ВМРО-ДПМНЕ Бојан Стојановски од говорницата побара коментар од премиерот Димитар Ковачевски за однесувањето на вицепремиерот Маричиќ. Ковачевски застана во одбрана на Маричиќ и рече дека тој ниту испраќал бакнежи ниту гестикулации и рече дека вицепремиерот веќе испратил демант.
По ова пратеничката Стојаноска процедурално доби збор и од говорницата побара оставка од Маричиќ, а додека таа говореше и останатите пратеници од ВМРО-ДПМНЕ, кои беа во салата, застанаа зад неа извикувајќи „оставка“.
Потпретседателот на Собранието, Горан Мисовски, кој претседаваше со седницата, им се обрати на пратениците од ВМРО-ДПМНЕ укажувајќи им која е постапката за барање оставка од министер и даде пауза од 15 минути.