За време на престојот во Скопје, со кој ќе ја заокружи годинашната турнеја низ Западен Балкан, претседателката на Европската комисија ќе има одвоени средби со претседателка Гордана Сиљановска-Давкова, со премиерот Христијан Мицкоски и со претседателот на Собранието, Африм Гаши
Претседателката на Европската комисија (ЕК), Урсула фон дер Лајен, в среда (15 октомври) доаѓа во Скопје во рамки на најновата турнеја низ земјите од Западниот Балкан.
За време на престојот во Скопје, Фон дер Лајен ќе има одвоени средби со претседателка Гордана Сиљановска-Давкова, со премиерот Христијан Мицкоски и со претседателот на Собранието, Африм Гаши.
Шефицата на ЕК ќе ја започне балканската турнеја во понеделник (13 октомври) со посетата на Тирана, Албанија. Таму ќе се сретне со албанскиот претседател Бајрам Бегај и со премиерот Еди Рама, по што ќе се обрати на отворањето на Регионалниот инвестициски форум на ЕУ за Западниот Балкан.
Оттаму, истиот ден Фон дер Лајен ќе отпатува за Тиват, Црна Гора, каде што ќе оствари средба со претседателот Јаков Милановиќ и премиерот Милојко Спајиќ. Во вторник ќе учествува на Инвестициска конференција за паметна и зелена иднина во Тиват.
Од Тиват во вторник продолжува за Сараево каде што ќе се сретне со членовите на Претседателството на БиХ и со претседавачката на Советот на министри, Борјана Кришто. Ќе го посети и Меморијалниот центар во Сребреница.
Работниот ден в среда Фон дер Лајен ќе го започне во Белград на средби со српскиот претседател Александар Вучиќ и премиерот Ѓуро Мацут, по што ќе замине за Приштина на средби со косовската претседателка Вјоса Османи и техничкиот премиер Албин Курти. Од Приштина, в среда попладне шефицата на ЕК ќе пристигне во Скопје, што е последна етапа од нејзината турнеја низ Западниот Балкан.
Според најавите на Европската комисија, претстојната турнеја ќе биде можност Фон дер Лајен да ја реафирмира поддршката на ЕУ за членство на земјите од регионот во Унијата, нивниот постепен пристап до Единствениот европски пазар, како и да разговара за спроведувањето на Планот за раст на Западниот Балкан.