На листата на номинираните еврокомесари се и имиња што веќе ѝ се познати на Европската комисија бидејќи дел од нив ја извршуваа оваа функција, вклучувајќи ја и самата Фон дер Лајен, која во јули беше реизбрана на чело на ЕК за уште еден петгодишен мандат
Шефицата на Европската комисија (ЕК), Урсула фон дер Лајен, денеска на прес-конференција во Стразбур го претстави својот нов тим на еврокомесари и на ресорите со кои тие ќе раководат во следните пет години. Говорејќи пред новинарите, рече дека новата Европска комисија ќе биде фокусирана на просперитетот, безбедноста и демократијата заедно со конкурентноста и дигиталната и енергетската транзиција.
Нагласи дека секој член на комисијата е еднаков и секој комесар има еднаква одговорност да ги исполни поставените приоритети.
„Сите комесари ќе мора да работат заедно. Во овој дух, секој извршен потпретседател, исто така, ќе има портфолио на кое ќе се фокусира, за што ќе мора да работи со другите комесари бидејќи она што влијае на безбедноста, влијае и на демократијата, она што влијае на економијата, влијае и на општеството, а она што влијае на климата и животната средина, влијае и на луѓето и бизнисот“,
вели таа.
Според неа, сите ќе бидат независни во работењето, но сите ќе ја преземат обврската за спроведување на договореното.
Every member of my team will bring in their own experience and perspectives on Europe.
— Ursula von der Leyen (@vonderleyen) September 17, 2024
Together, we will be one team, working towards one common goal.
To make Europe stronger. pic.twitter.com/xIvDNv4C7t
Посочи дека при распределбата на ресорите водела и сметка за постигнување баланс и во однос на половата и географската застапеност. Така, во Комисијата ќе има 11 жени и 16 мажи.
„Кога го добив првиот сет на номинации имаше околу 22 отсто жени и 78 отсто мажи. Тоа беше неприфатливо. Затоа работевме со земјите членки и успеавме да го подобриме балансот на 40 отсто жени и 60 отсто мажи“,
рече Фон дер Лајен.
Ова се шесте извршни потпретседатели на комисијата назначени од Фон дер Лајен:
Како што истакна Фон дер Лајен, новата Европска комисија ќе има шест извршни потпретседатели, од кои четири се жени, а двајца мажи.
Шпанката Тереза Рибера ќе биде извршена потпретседателка на чиста праведна и конкурентна транзиција и еврокомесарка за политика на конкурентност;
Финката Хена Виркунен е извршна потпретседателка за технологија, суверенитет, безбедност и демократија и еврокомесарка за дигитални технологии;
Романката Роксана Манзату е задолжена за вештини и стручно оспособување на луѓето, а воедно ќе биде и еврокомесарка за вештини, образование, култура, квалитетни работни места и социјални права;
Естонката Каја Калас е висок претставник на ЕУ за надворешна политика и бебзедност;
Французинот Стефан Сежурне ќе биде извршен потпретседател за просперитет и индустриска стратегија и еврокомесар за индустрија, мали и средни претпријатија;
Италијанецот Рафаеле Фито ќе биде одговорен за кохезија и реформи и еврокомесар за кохезивна политика.
Today I’m presenting my team for the next five years.
— Ursula von der Leyen (@vonderleyen) September 17, 2024
A team of competent and motivated women and men ready to work together.
For a stronger Union.
For a more secure Europe.
For a more competitive Europe. https://t.co/Og37dmsXcJ
На листата на номинираните еврокомесари се и имиња што веќе и се познати на Европската комисија бидејќи дел од нив ја извршуваа оваа функција, вклучувајќи ја и самата Фон дер Лајен, која во јули беше реизбрана на чело на ЕК за уште еден петгодишен мандат.
Кои се имињата на номинираните еврокомесари
Секоја од 27-те земји членки ќе добие по една функција во Комисијата.
Така, Словакот Марош Шефчович ќе биде еврокомесар за трговија, економска безбедност, меѓуинституционални односии транспарентност;
Летонецот Валдис Домбровскис за економија, продуктивност, имплементација и поедноставување;
Хрватката Дубравка Шуица е предложена за еврокомесарка за Медитеранот;
Унгарецот Оливер Вархеји е предложен за еврокомесар за здравје и благососотојба на животните:
Холанѓанецот Вопке Хукстра е еврокомесар за клима, нето нула емисии и чист раст;
Литванецот Андриус Кубилиус, за одбрана и Вселената;
Чехот Јозеф Сикела е за меѓународни партнерства;
Кипранецот Костас Кадис ќе раководи со ресорот рибарство и океани;
Португалката Марија Луис Албакерки со финансиските услуги, штедењето и инвестициите;
Белгијката Хаџа Лабиб со подготвеноста и менаџирањето на кризи;
Австриецот Магнус Брунер со внатрешните работи и миграцијата;
Јесика Розвол од Шведска ќе биде еврокомесарка за животна средина, отпорност на водите и конкурентна циркуларна економија;
Пјотр Серафин од Полска за буџет, борба против измамите и јавна администрација;
Ден Јоргенсен од Шведска за енергија и домување;
Бугарката Екатерина Захариева за истражување и иновации;
Ирецот Мајкл Мекграт ќе биде комесар за демократија, правда и владеење на правото;
Гркот Апостолос Цицикостас за одржлив транспорт и туризам;
Кристоф Хансен од Луксембург е за земјоделство и храна;
Малтежанецот Глен Микалеф за меѓугенерациска правичност, култура, млади и спорт.
Марта Кос од Словенија е номинирана за комесар за проширувањето на ЕУ
Словенечката политичарка Марта Кос доаѓа на местото на Унгарецот Оливер Вархеји и е назначена да биде еврокомесарка за проширување и соседска политика.
Марта Кос е експерт за комуникации и менаџмент. Претходно била амбасадор на Република Словенија во Германија и Латвија, а подоцна и во Швајцарија и Лихтенштајн.
Кариерата ја започнала како новинар во Словенечката национална радио и телевизија, а неколку години работела и како дописник од Германија. Оттаму, преминала во Владата на Република Словенија како портпарол.
Инаку, изборот на Кос се уште би можел да биде доведен во прашање поради блокадата на конзервативната словенечка опозиција во тамошниот парламент.
Според Фон дер Лајен, сега по официјалното претставување на составот на Европската комисија пред Европскиот парламент, тој може да продолжи со формалната постапка за одобрување на новиот Колеџ на комесари.
Инаку, комисијата е најмоќната институција на Европската унија и има моќ да предлага нови закони на ЕУ и да потпишува договори за слободна трговија.
Се очекува новата Комисија да започне со работа до крајот на годината.