Вонреден инспекциски надзор во кругот на стара „Железара“ откри дека таму работат фирми без елаборати за заштита на животната средина, соопштија од Државниот инспекторат за животна средина.
Изминатите два дена нивните инспектори задно со Инспекторатот на Град Скопје направиле вонреден надзор во индустриската зона, каде што работат неколку компании. Контролите биле направени во средата (9 декември) и синоќа (10 декември) по барање на жителите на Гази Баба.
„При првиот инспекциски надзор е утврдено јасно прекршување на Законот, констатирано е дека повеќе правни субјекти работат без елаборати за заштита на животната средина. Сите се задолжени во најкус можен рок да изработат елаборати и да обезбедат одобрение од соодветна институција во согласност со закон“,
соопштија од Државниот инспекторат.
Во втората контрола, синоќа, инспектори и претставници на акредитирана лабораторија направиле мерења на лице место и се очекуваат резултатите во наредните денови.
Граѓаните се жалеле и на бучава која доаѓа од кругот на „Железара“, а во надзорите било утврдено дека таа доаѓа од фабриката „Макстил“.
„Во текот на инспекцискиот надзор е побарано објаснување за бучавата на која се жалеа граѓаните на Гази Баба. Беше потврдено дека бучавата доаѓа од ’Макстил‘, поточно од електричната печка за топење старо железо, која и покрај изолацијата на погонот, создава силни звуци кои пробиваат во надворешната околина. ’Макстил‘ е задолжен да го води производниот процес на начин кој нема да создава бучава и да го нарушува мирот и спокојот на граѓаните“,
додаваат од инспекторатот.