Како што информираат од Кривичен, досега не е донесена правосилна одлука по ниту еден од приговорите, затоа што уште течат роковите во кои Министерството за внатрешни работи (МВР) треба да се произнесе по нив, како што налага законот
По изминат безмалку еден месец од стартот на системот „Безбеден град“ во одделот за прекршоци на Основниот кривичен суд Скопје се поднесени вкупно 476 приговори. Станува збор за поднесени барања за поведување прекршочна постапка од лица на кои им стигнала порака со платен налог дека сториле сообраќаен прекршок, но, не сакаат да ја платат во Министерството за внатрешни работи (МВР), затоа што сметаат дека не сториле прекршок или дека има недостатоци во системот.
Имено, како што појаснуваат и од скопскиот Кривичен суд, по издавањето прекршочни налози за евидентирани сообраќајни прекршоци, граѓаните и правните лица кои не ја прифаќаат одговорноста за сторениот прекршок имаат законско право да поднесат приговор до надлежниот суд.
Што се однесува до податоците на судот за првиот месец од почетокот на примената на системот, многу повеќе приговори се поднесени од правни лица, односно фирми, отколку од физички лица.
Според Кривичен, од вкупно 476 поднесени приговори, 431 од нив дошле од фирми, додека само 45 од физички лица.
По предметите постапуваат 16 судии од одделот за прекршоци при Основниот кривичен суд Скопје.
Како што информираат од Кривичен, досега не е донесена правосилна одлука по ниту еден од приговорите, затоа што уште течат роковите во кои Министерството за внатрешни работи (МВР) треба да се произнесе по нив, како што налага законот.
„Сите поднесени приговори се навремено заведени во судот и согласно одредбите Законот за прекршоци, во утврдениот законски рок од 8 дена, доставени се до Министерството за внатрешни работи за нивно произнесување, што претставува неопходен предуслов за понатамошно постапување. Па заради тоа, до овој момент судот нема донесено правосилна судска одлука по сообраќајните прекршоци евидентиран преку системот ‘Safe City’, а по кои граѓаните или правните лица истакнале приговор“,
велат од Кривичен.
Оттаму информираат дека најчесто евидентирани прекршоци за кои се однесуваат најголем дел од приговорите се за неприспособена брзина, поминување на црвено светло и управување со нерегистрирано возило.
Од Кривичен појаснуваат и зошто најголем дел или безмалку сите приговори се поднесени од фирми. Предизвикот, велат од Судот, е во возилата кои се дадени на користење со договор за лизинг, како и случаите каде граѓани продале возила, но не биле одјавени во Министерството за внатрешни работи.
„Како најзначајни предизвици во тековниот период се издвојуваат приговорите поднесени од правни лица – лизинг компании за возила дадени на користење врз основа на договор за лизинг, како и приговорите од граѓани кои претходно ги отуѓиле своите возила, но истите не биле одјавени во Министерството за внатрешни работи, поради што им биле издадени прекршочни налози“,
велат од скопскиот Основен кривичен суд.
Што се однесува до одземањето возило, што исто така беше воведено како мерка со измените на Законот за сообраќај, како што појаснуваат од Кривичен, кај нив досега не е поведена таква постапка, која се води како кривичен предмет.
„Основниот кривичен суд Скопје, ценејќи ја важноста и јавниот интерес за воведувањето на новиот систем за безбедност во сообраќајот, ќе продолжи да постапува по сите предмети во законски утврдените рокови и навремено и транспарентно да ја информира јавноста за понатамошниот тек на постапките, но и за сите предизвици и обврски кои граѓаните се должни да ги преземат“,
посочуваат од Судот.
Системот „Безбеден град“ или „Сејф сити“ почна со функција на 1 февруари, на територијата на градовите Скопје, Куманово и Тетово, како и на коридорите 8 и 10.
Со тоа и официјално почна санкционирањето на граѓаните што направиле прекршок детектиран од камерите на „Безбеден град“.
Како што информираа од МВР, се детектираат четири типични сообраќајни прекршоци како непрописно паркирање, управување со брзина поголема од пропишаната, минување на црвено светло и управување возило со изминат рок на важноста на сообраќајната дозвола.
Неодамна министерот за внатрешни работи Панче Тошковски изјави дека на листата на прекршоци ќе влезе и блокирање раскрсница, односно ако возило остане заглавено на неа иако претходно поминало на зелено светло. Прекршокот, рече Тошковски, нема да се третира како поминување на црвено светло.
Инаку, ако се соберат податоците што МВР ги споделуваше изминатите недели за бројот на сторени прекршоци, од 2 до 22 февруари се регистрирани вкупно околу 14 400 прекршоци.
Имено, од 2 до 8 февруари се регистрирани 4 991 прекршок, од 9 до 15 февруари – 4 490 и од 16 до 22 февруари – 4 910 прекршоци.
Сепак станува збор за кумулативни бројки од податоците за детектирани прекршоци во Скопје, Куманово и Тетово, и на коридорите 8 и 10, каде што системот е во функција.