Првопријавениот Б.З., како сопственик и управител на правниот субјект, во бруто-билансот за 2025 година не ги признал како приход застарените и ненамирени обврски, како и книговодствено евидентираните дадени позајмици кон физички лица кои не биле вратени до крајот на годината
Управата за финансиска полиција поднесе кривична пријава до Основното јавно обвинителство Струга против физичкото лице Б.З. и неговата фирма поради сомнение за сторено кривично дело даночно затајување по член 279 од Кривичниот законик.
Од Финансиската полиција велат дека пријавените го оштетиле Буџетот на Република Северна Македонија за вкупен износ од 4 520 084 денари.
Првопријавениот Б.З., како сопственик и управител на правниот субјект, во бруто-билансот за 2025 година не ги признал како приход застарените и ненамирени обврски во износ од 30 946 170 денари. Бидејќи за нив немало поведено судски постапки за наплата, тој бил должен да ги пријави, со што избегнал плаќање данок на добивка од 3 094 617 денари.
Финансиската полиција утврдила и дека книговодствено евидентираните дадени позајмици кон физички лица во износ од 14 254 665 денари, кои не биле вратени до крајот на годината, не биле книжени како непризнаени расходи. Со ова не бил пресметан, пријавен и платен дополнителен данок на добивка во износ од 1 425 467 денари.
„Со наведените дејствија, физичкото и правното лице не ги пресметале, не ги пријавиле и не ги уплатиле законски утврдените даночни обврски, со што го оштетиле Буџетот на Република Северна Македонија за вкупен износ од 4 520 084 денари“,
се вели во соопштението од Управата за финансиска полиција.