Во описот од Финансиска се вели дека пријавениот, во текот на 2025 година, само два дена пред истекот на постоечки договор со авторска агенција, набрзина склучил пет договори со физички лица кои биле во вкупен износ од 3 608 708 денари
Управата за финансиска полиција поднесе обемна кривична пријава против поранешниот в.д. директор на ЈП „Комунална хигиена“ Скопје, Сабахадин Рустеми. Тој се товари за три кривични дела злоупотреба на службената положба, фалсификување исправа и проневера во службата – во обид.
Според истрагата, Рустеми се обидел да овозможи противправна корист на неколку лица во вкупен износ од околу 68,5 илјади евра.
Во описот од Финансиска се вели дека пријавениот, во текот на 2025 година, само два дена пред истекот на постоечки договор со авторска агенција, набрзина склучил пет договори со физички лица кои биле во вкупен износ од 3 608 708 денари.
Два од договорите биле фиктивни во вредност од по 775 000 денари за интелектуални услуги – давање совети, имплементирање нови техники за заштита на животната средина во вкупна вредност од 1 550 000 денари, со лица кои биле негови лични познаници и за кои бил свесен дека немаат никаква експертиза во областа на заштита на животната средина.
„И покрај тоа што бил свесен дека услугите не се извршени, нема да бидат извршени, ниту постои објективна можност да бидат извршени во времетраење на договорот со авторската агенција, склучил три договори со физички лица во вредност од по 686 236 денари за сметководствени услуги и изготвување годишна сметка во вкупна вредност од 2 058 708 денари“,
се наведува во соопштението од Финансиска.
Тој ова го направил иако бил свесен дека едно од лицата немало никаква експертиза во вршење сметководствени услуги и не е регистрирано како овластен сметководител во Регистарот на овластени сметководители.
Откако првичниот обид за исплата бил спречен од страна на Финансиската полиција, Рустеми спровел нова постапка преку друга агенција. Преку овој договор бил ангажиран камион за собирање смет, при што биле потпишувани патни налози и исплатени 604 461 денари.
Според овие дејствија, Финансиската полиција смета дека постои основано сомнение дека пријавениот постапил спротивно на Законот за јавни набавки и на утврдените начела на јавните набавки односно склучил фиктивни договори и договори без да биде спроведена јавна набавка, на кој начин ги сторил кривичните дела, а со намера да овозможи корист на договорните физички лица во вкупен износ од 4 213 169 денари.
Рустеми од октомври минатата година се наоѓа во притвор, откако против него и уште едно лице беше отворен кривичен предмет, поради основано сомнение за сторено дело загрозување на животната средина и природата со отпад од член 230 став 1 од Кривичниот законик. Според обвинителството, осомничените постапиле спротивно на Законот за управување со отпад и на обврските од Оперативната програма за собирање и транспортирање комунален отпад, што резултирало со создавање мали депонии на јавни и сообраќајни површини во Скопје.