Министерот вели дека повеќето нови случаи се асимптоматски или со лесна клиничка слика и во најголем дел од веќе познати кластери. Сепак, не исклучува можност за локализиран полициски час во покритичните општини
Нема неконтролирано ширење на коронавирусот, оцени денеска министерот за здравство Венко Филипче посочувајќи дека, и покрај зголемениот број нови случаи, повеќето се асимптоматски или со лесна клиничка слика и од веќе познати кластери.
Пренесувајќи ги заклучоците од денешната седница на Комисијата за заразни болести, Филипче изрази надеж дека здравствениот систем во земјава добро ќе се справи и со овој бран на епидемијата.
„Анализите на Комисијата, според податоците од терен, покажуваат дека најголем број од новите случаи се асимптоматски или со лесна клиничка слика и може да се лекуваат дома. Тоа ни дава за право да сметаме дека здравствениот систем ќе се справи добро и со овој бран, за што има доволно капацитети. Околу 70 проценти од новите случаи во Скопје се од познати кластери, претежно во Сарај и Чаир“,
изјави Филипче, на прес-конференција.
Тој рече дека во Сарај денеска помал број нови пациенти и дека заразата постепено спласнува, додека во Чаир сѐ уште се работи на терен и се прават епидемиолошки анкети. Новодијагностицираните случаи во Штип, како што рече, главно се поврзани со случаите во текстилните фабрики. Поради тоа, до понеделник се затвораат пет фабрики, за дотогаш да се истестираат близу 600 вработени. Анализи на терен се прават и во Куманово, каде што денеска имаше 12 нови случаи на коронавирус.
Филипче рече дека на седницата на Комисијата за заразни болести се разговарало за евентуални дополнителни мерки во критичните општини, за што, како што посочи, ќе се почекаат резултатите од наредните два-три дена за да се види дали има потреба од рестрикции.
Како општини во кои е можно враќање на карантинот или воведување локализиран полициски час ги спомна Чаир, Сарај, Гази Баба и делови од Штип.
Министерот вели дека е во тек интензивен скрининг на сите контакти што ги даваат новодијагностицираните и дека оваа стратегија продолжува и понатаму.
„Со дел од граѓаните, сепак, имаме слаба соработка. Дел од нив одбиваат да се јават во здравствените установи, па можните случаи ги пријавуваат соседи. Вирусот постои и мора сите да се придржуваат до препораките и да не ги кријат информациите“,
рече Филипче.
Тој најави дека дека, поради зголемениот број новозаболени, во текот на оваа недела одново ќе се разговара за дел од мерките што треба да бидат дополнително укинати, односно за отворање на градинките, но и на границите.