Секојдневно пропаѓа митот за наводната економска способност на ВМРО-ДПМНЕ. Нема ниту еден економски параметар во кој оваа влада не е барем двојно послаба од владата на СДСМ – вели лидерот на СДСМ
Во првата половина од 2025 странските инвестиции се преполовени во однос на првата половина од 2024, кога СДСМ беше на власт, со што пропаѓа пропагандата на власта за наводен инвестициски бум, објави претседателот на СДСМ, Венко Филипче.
„Со овој податок пропаѓа и последната излитена пропаганда на власта, дека во Македонија се случува инвестициски бум. Секојдневно пропаѓа и митот за наводната економска способност на ВМРО-ДПМНЕ. Нема ниту еден економски параметар во кој оваа влада не е барем двојно послаба од владата на СДСМ“,
наведува Филипче во објавата.
По ова, реагираше партијата на власт.
Од ВМРО-ДПМНЕ велат дека е иронично што Филипче држел лекции за економија кога летувал луксузно.
„Во негово време, инвеститорите не доаѓаа, бегаа. Македонија ја гледаа како држава заробена во корупција, рекети и фантомски фирми. Единствениот бум беше во тендери и раст на лични сметки на привилегирана СДС-ДУИ каста“,
велат од владејачката партија.
Според нив, СДСМ наместо нови фабрики, им донеле на граѓаните нови долгови, а наместо работни места имало затворање компании. Наместо економски раст, имало галопирачка сиромаштија.