Граѓаните имаат редовен пристап до лекови во текот на целиот месец и повеќе не прават домашни резерви и не стравуваат дека ќе останат без потребниот лек. Тоа се овозможи со укинувањето на квотите за лекови на рецепт во аптеките ширум целата држава и реши децениски проблем, вели министерот за здравство Венко Филипче.
„Веќе десетти месец како лекови има во секое време, било да е тоа на почетокот, на средината или кон крајот на месецот. Со оваа мерка која ја имплементиравме најмногу им помогнавме и на пензионерите. Се грижиме максимално за нивното здравје. Горд сум што ги решаваме најкрупните и најважните сегменти од јавното здравство. Докажавме дека пациентот ни е на прво место. Го зајакнавме нашиот здравствен систем. Продолжуваме и во следниот период да го унапредуваме јавното здравство“,
потенцираше министерот Филипче.
Мерката за укинување на квотите за лекови на рецепт во аптеките започна во август 2019 година, како прва фаза во аптеките во регионите на туристичките места Охрид, Дојран, Гевгелија, Ресен и Струга. Минатата година, на први октомври, се укинаа целосно квотите во аптеките на територија на целата држава.