И вториот тест за ковид-19 на министерот за здравство Венко Филипче е негативен, информираше самиот на својот профил на Фејсбук и најави дека од денеска продолжува со вообичаен начин на работа во Министерството за здравство.
„Денеска го добив резултатот од мојот втор тест на ковид-19, кој исто како и првиот е негативен на вирусот. Со ова, практично, завршува мојата 14-дневна изолација која ја спроведов на сопствена иницијатива и покрај тоа што епидемиолозите не сметаа дека сум во ризик. Во изминатите две недели сите мои работни обврски ги извршував од изолација и одржував редовни онлајн-состаноци со Комисијата за заразни болести, лекарите во здравствените установи, колегите во Владата и медиумите и сѐ функционираше беспрекорно“,
напиша Филипче на Фејсбук.
Филипче беше во изолација откако заедно со премиерот Оливер Спасовски, вицепремиерот Бујар Османи и министерот за образование Арбер Адеми присуствуваа на седница на општинскиот кризен штаб во Куманово, на која беше и градоначалникот Максим Димитриевски кој следниот ден доби резултати дека е позитивен на коронавирусот.
Неколку дена подоцна, Димитриевски информираше дека се тестирал во повеќе лаборатории и дека резултатите му се негативни, па побара да му биде укината самоизолацијата. Негативни резултати минатата недела добиле и Спасовски, Османи и Адеми, но изјавија дека превентивно остануваат во изолација.
Настанот во Куманово предизвика препукувања меѓу Владата и локалната самоуправа бидејќи бил организиран иако членовите на општинскиот кризен штаб и градоначалникот чекале резултати за ковид-19.
Државниот санитарен и здравствен инспекторат утврдил пропусти во начинот и условите во кои се земале брисовите на кумановскиот градоначалник и на останатите членови на кризниот штаб.
Освен што ќе одговара прекршочно, на Димитриевски му се заканува и кривична одговорност за прекршување на здравствените прописи во услови на епидемија. Според градоначалникот, пак, ова е монтиран случај и класична злоупотреба на инструментите на власт.
Поврзана вест:
СДСМ се оградува од изјавите и однесувањето на кумановскиот градоначалник