Филипче потенцираше дека преку воспоставување на закони, институционални реформи и услуги за заштита, претходната влада на СДСМ создала основи за долгорочни и одржливи политики за заштита на жените од насилство
Осврнувајќи се на политичката и економската ситуација во земјата, Филипче во обраќањето ја изедначи политиката на сегашната власт со режимот на Никола Груевски
Претседателот на Социјалдемократскиот сојуз на Македонија (СДСМ), Венко Филипче смета дека актуелната влада, предводена од ВМРО-ДПМНЕ, ги урива основите поставени за заштита на жените и промовирање на родовата еднаквост.
Говорејќи на работилница организирана од Форумот на жени на СДСМ, во рамките на кампањата „16 дена активизам за борба против насилството врз жените и девојчињата“, Филипче истакна дека СДСМ е партијата која системски ја поставила борбата против родово базираното насилство како државен приоритет.
Филипче потенцираше дека преку воспоставување на закони, институционални реформи и услуги за заштита, претходната влада на СДСМ создала основи за долгорочни и одржливи политики за заштита на жените од насилство.
„Ние сме и потписници на Истанбулската Конвенција, која е важен меѓународен документ за спречување и заштита од насилство врз жените. Отворивме многу центри за рана детекција, каде мултидисциплинарно работеа социјален работник, психолог, гинеколог“,
рече Филипче.
Тој посочи дека превенцијата е клучна во борбата против насилството и дека животот на секоја жена мора да биде заштитен, со институции кои функционираат за граѓаните.
Критиките кон сегашната власт беа насочени кон наводното запоставување на овие системски реформи.
„Меѓутоа гледаме како е кога на власт ќе дојде еден авторитарен режим кој што не се грижи за ништо друго, освен за своите сопствени, тесни, теснопартиски интереси, а сè друго паѓа во втор план“,
изјави претседателот на СДСМ.
Филипче потсети и дека СДСМ била прва партија која вовела квоти и мерки за вистинска застапеност на жените, промовирајќи женско лидерство на сите нивоа.
„Напорно работевме да го промовираме женското лидерство и во тоа успеавме. Донесовме листи во кои што точно се знаеше колкав ќе биде процентот на жени, колкав ќе биде процентот на млади“,
додаде Филипче.
Осврнувајќи се на политичката и економската ситуација во земјата, Филипче во обраќањето ја изедначи политиката на сегашната власт со режимот на Никола Груевски.
„Власта на Христијан Мицкоски продолжи каде што застана Груевски. Нашите граѓани секој ден по различни фокус групи сфаќаат што губат со власта на ВМРО-ДПНЕ“,
истакна тој.
Тој ја потенцираше ситуацијата со работниците, докторите и наставниците, обвинувајќи ја власта за притисоци и застој во покачувањето на платите, за разлика од периодот на СДСМ кога платите на докторите биле покачени за 40 отсто.
„Веќе и малите деца знаат, ова е една ненародна власт. Нема друга дефиниција. Продолжија таму кај што се застана на ниво на Груевски. Ништо друго“,
рече Филипче додавајќи дека единствена алтернатива која може да и се спротивстави е Социјалдемократскиот сојуз на Македонија.
Филипче и минатата недела, на прес-конференција, рече дека владејачката ВМРО-ДПМНЕ е контролирана од поранешниот премиер Никола Груевски и дека во партијата се само извршители на неговите политики.
Филипче го изнесе ова тврдење осврнувајќи се на изјавата на претседателката на државата Гордана Сиљановска-Давкова дека ова не е време за реформи, што според него е директно поврзана со активностите на Груевски од странство.