Коментирајќи го мислењето што го објави Венецијанската комисија за предлог-законите за Јавното обвинителство и за Советот на јавни обвинители, Филипче на вечерашниот митинг во Маврово и Ростуше рече дека на состанок со премиерот понудил заеднички да работата на реформите во правосудството, но власта не прифатила ниту една нивна забелешка
Денешната порака од Венецијанската комисија е јасна – потребни се итни реформи за независно судство, рече претседателот на Социјадемократскиот сојуз на Македонија (СДСМ) Венко Филипче од граѓанската трибина што партијата вечерва ја одржа во општина Маврово и Ростуше, во рамките на кампањата за локалните избори в недела.
Коментирајќи го мислењето што го објави Венецијанската комисија за предлог-законите за Јавното обвинителство и за Советот на јавни обвинители, Филипче рече дека на состанок со премиерот понудил заеднички да работата на реформите во правосудството, но власта не прифатила ниту една нивна забелешка.
„Како никогаш до сега, пред неколку месеци, се обидов да ја променам политичката култура и бев на состанок кај премиерот. Една од работите за коишто разговарав беше заеднички да работиме на реформистката агенда, да ги донесеме сите реформски закони во правосудството, за да се придвижи тој сегмент напред, да се придвижиме кон Европа така како што сите очекуваат од нас, така како што нашите граѓани сакаат тука да видат. Власта не прифати ниту една забелешка“,
рече Филипче.
Говорејќи во таа насока, лидерот на СДСМ рече дека ниту еден од 12 закони кои се дел од реформската агенда до ден денес не се ни поднесени во Собранието.
„И покрај тоа што формиравме наш експертски тим, нашите забелешки за реформските закони, никој не ги зема предвид. Одговор од Министерството за правда, до сега немаме. Ниту еден од 12 закони кои се дел од реформската агенда, не само што не се донесени во Собрание, тие до ден денес не се ни поднесени“,
кажа тој пред присутните граѓани.
Затоа, како што кажа лидерот на СДСМ, овој изборен циклус е важен и историски, бидејќи од него зависи иднината на државата и на граѓаните.
„Овој изборен циклус ќе биде сериозен знак за оваа власт, ќе испратиме силна порака дека се некадарни, дека се незаинтересирани, дека немаат капацитет. И затоа, мораме масовно да излеземе на гласање в недела. Не може една мала група на луѓе да ја држи во заложништво оваа држава, не може да се поигруваат со судбината на сите граѓани. Ова е прогресивна држава, прогресивен народ кој сака реформи, кој сака можности, кој сака напред во Европа“,
порача претседателот на СДСМ, Венко Филипче.